El primer borrador de la comisión del asturianu apunta a la cooficialidá “como únicu camín válidu” pa la so sobrevivencia

Concha Masa, presidenta de la Comisión Especial d’Estudiu sobre'l Réxime de Proteición y Promoción del Asturianu, presentó esti llunes el primer borrador dictame coles conclusiones del mesmu. El documentu afita la cooficialidá “como únicu camín validu” pa la sobrevivencia de la llingua asturiana y del gallego-asturiano.

Dos años de trabayu y les intervenciones d’espertos de numberosos campos, tanto de dientro como de fuera d’Asturies –en seis sesiones na Xunta Xeneral ente marzu y mayu d’esti añu–, “que coincidieron na necesidá d’aumentar al máximu la proteición y la difusión de la llingua asturiana teniendo como oxetivu fundamental la oficialidá, porque pensamos, como ellos mesmos manifestaron, ye definitivamente ye l’únicu métodu de garantizar la pervivencia de la nuesa llingua”, apuntó Masa, recuéyense nesti documentu . Asina, nel puntu últimu, el de les conclusiones, el borrador dictame de la comisión del asturianu calca na “necesidá d’aniciar nel plazu más breve posible un procesu de reforma del Estatutu d’Autonomía d’Asturies que, d’alcuerdu cola solución constitucional prevista para estos casos, lleve a la cooficialidá del asturianu nel Principáu (incluyendo tamién la del eonaviego o gallego-asturiano nel su ámbitu) como únicu camín válidu pa garantizar de manera plena la so proteición y promoción pa  preservar con posibilidaes de futuru’l nuesu patrimoniu llingüísticu”.

Izquierda Xunida (IX) unvió esti documentu al restu de grupos parllamentarios p’aldericar sobre’l mesmu na sesión de la comisión prevista pa les 10 hores del vienres na sala Xovellanos de la Xunta Xeneral. Nesta xornada va afitase un calendariu de trabayu pa que puedan presentar alegaciones y propuestes de modificación pa consensuar un dictame definitivu que va llevase a Plenu.

Masa nun negó que fora imposible, por cuestión de tiempo, reformar l’Estatutu no que queda de llexislatura, pero incidió na necesidá d’algamar “el mayor consensu políticu y social nel procesu”, dalgo que ve difícil daes les posiciones polítiques amosaes hasta la fecha. “L’actitú de la FSA cambió a partir del últimu congresu y pensamos que debe reflexase na posición del grupu parllamentariu, pero son cuestiones internes. Nun sabemos hasta qué puntu la FSA pue forciar un calendariu pal grupu parllamentariu”, espresó Masa.

Falta d’ayudes estatales

Na so intervención, la diputada d’IX repasó los aspeutos más destacados de les intervenciones d’espertos na Xunta Xeneral, incidiendo en cuestiones como la falta de recursos estatales que sí tienen les otres llingües cooficiales. “Asturies ta collaborando, economómicamente inclusive, al desarrollu y mantenimientu d’otres llingües, mientres que la llingua asturiana pola so situación nun pue recibir nengún tipu d’ayuda”, recordó.

Tamién citó la importancia económica que podría tener l’idioma “de cara al turismu, al traviés de la toponimia y l’etiquetáu de productos, que son un valor añadíu a la imaxe d’Asturies” y incidió “nel cambiu d’actitú de la sociedá asturiana” pa col asturianu, poniendo d’exemplu los datos del avance de la III Encuesta Sociollingüística d’Asturies, que se presenta mañana nel marcu de les XXXVI Xornaes Internacionales d’Estudiu de l’Academia de la Llingua Asturiana (ALLA). La importancia que tuvo l’enseñu pa esti cambiu, la situación de la lliteratura, la importancia de los medios de comunicación públicos “pa la pervivencia y difusión de la llingua asturiana” y les recomendaciones de la UNESCO pa col asturianu, completaron la comparecencia de Masa.

Otres conclusiones

Les intervenciones de los espertos na Xunta Xeneral, sumaes a la información recibida, previa solicitú de la comisión, de l’ALLA y los conceyos –la Universidá d’Uviéu nun atendió a la mesma, al igual que 43 conceyos, ente ellos Uviéu, Mieres, Ribeseya, Valdés o Samartín del Rei Aurelio–, sirvieron p’algamar delles conclusiones que se sumen a la demanda de la cooficialidá. Asina, el documentu insta a aumentar l’apoyu institucional a l’ALLA, reclama “una política d’ayuda y apoyu a la creación y divulgación de la lliteratura asturiana”, la emisión de “polo menos” ún de los trés informativos diarios de la TPA n’asturianu dafechu, la negociación col Estáu pa crear la especialidá docente y la puesta en práutica de “midíes eficaces de xeneralización de la enseñanza del asturianu en toles etapes y centros educativos  del Principáu”.