La militancia escueye a Argüelles como coordinador xeneral d'IX

Algamó'l 36,4 por cientu de los votos al sumar 502 en total, 62 más qu'Alejandro Suárez González, segundu con más apoyos.

L'alcalde de Ḷḷena, cargo que dexará proximamente, conviértese asina nel sustitutu de Manuel González Orviz como coordinador xeneral d'Izquierda Xunida (IX) n'Asturies. L'apoyu algamáu en Llangréu (102 por 7 de los sos rivales) y el bon resultáu na asamblea de Xixón, la más numberosa, onde perdió por poca diferencia con Suárez González (14 votos; 92 por 106) , foron claves nel so trunfu.

Nes primaries celebraes el vienres participaron un total de 1.379 militantes, de los que 502 apoyaron a Ramón Argüelles (36,4 por cientu) y 440 al coordinador d'IX d'Uviéu (31,9 por cientu). Mentes, Fernando Díaz Rañón sumó 331 votos (22,7 por cientu) y 93 a María Teresa Lorenzo 'Telly' (6,8 por cientu). Contabilizáronse 29 votos en blancu y ún nulu.

Asamblea esta fin de selmana

Argüelles aconceyó esta mañana con tolos candidatos cola fin d'algamar consensos de cara a l'asamblea d'IX prevista pal vienres y sábadu n'Avilés. Nella ha d'escoyese la direición política de la formación.

“De'ehí va salir la coordinadora que va a ser l'órgano que rixa Izquierda Xunida, l'alma mater pa la llexislatura, y prestaríame que pudiéramos dir con una llista consensuada, porque'l sistema de primaries tien un pelligru: que pueda haber un coordinador, pero, si tolos demás pónense en contra, pue ser que'l coordinador nun tenga más que voz porque l'órganu executivu, como la coordinadora, taría en manes d'otra xente. Creo que somos toos conscientes de que tenemos que dir nesti barcu y los mios compañeros asina treslladáronmelo”, apuntó Argüelles tres la reunión.