La media de contaxos diarios xube a 427

Na selmana anterior yera de 322. El vienres, con 548 casos de COVID-19, algamóse la cifra más alta de la quinta fola, a niveles de xunetu.

Siguen aumentando la incidencia, cerca yá del mediu millar de casos cada 100.000 habitantes a 14 díes, y les hospitalizaciones n'Asturies. Esta fin de selmana detectáronse 1.512 positivos, cifra superior a la rexistrada nos 7 díes na selmana del 22 al 28 de payares, cuando se comunicaron 1.224.

El vienres, con 548 casos nuevos, confirmóse como la xornada con más positivos dende'l 23 de xunetu, día con 587. El sábadu hebo 527 y ayeri, 437.

Nos 7 díes últimos rexistróse una media de 427 contaxos diarios. Dende qu'entamó la cuarta fola esti datu evolucinó de la manera siguiente: 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32, 29, 70, 175 y 322, hasta los 427 actuales.

Cuatro finaos

Esta fin de selmana hebo que llamentar la muerte de 4 persones cola enfermedá causada pol coronavirus SARS-CoV-2. Dende qu'entamó l'andanciu finaron 2.114 persones.

El númberu d'hospitalizaos xube de 162 a 177. D'ellos, 140 tán en planta, 5 más que'l xueves, y 37 na UCI, 10 más.

Na semeya, primeros viales de les vacunes pediátriques 'Comirnaty' de Pfizer, un total de 24.000 dosis, llegaes a Asturies esta mañana pa principiar el miércoles cola vacunación a los 60.000 asturianos d'ente 5 y 11 años.