322 contaxos diarios de media la selmana pasada

Na actualización última algamáronse los 150 hospitalizaos que marcaba Salú como llende.

La selmana pasada detectáronse 2.254 positivos, más de 1.000 más que l'anterior, cuando se comunicaron 1.224. Suponen una media de 322 casos nuevos de COVID-19 diarios, polos 175 de los 7 díes previos, algamando unes cifres que nun se daben dende la selmana última de payares, cuando hebo 289.

La evolución d'esti datu dende l'entamu de la cuarta fola ye la siguiente: 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32, 29, 70 y 175, hasta los 322 actuales. Otra manera, nos díes últimos contabilizáronse 433 contaxos el vienres, 372 el sábadu, 287 el domingu, 327 el llunes, 307 el martes y 444 ayeri, lo qu'afita la tendencia ascendente nesta quinta fola de la pandemia.

El llunes finó con 152 hospitalizaos, superando la llende que dende la Conseyería de Salú marcaron como momentu pa recomendar restricciones, cifra que na actualización última baxó a 150. Les primeres anunciáronse'l vienres, consistentes na esixencia de mididores de CO2 a la hostelería y los ximnasios, y más inspeiciones a estos establecimientos, pero nun se descarten más de siguir l'aumentu de casos.

127 pacientes tán en planta, 23 más que'l xueves pasáu, y 23 na UCI, 4 más. Hebo que llamentar 11 muertes nesos díes, qu'aumenta'l total del andanciu a 2.107.

Na semeya, vacunación de refuerzu de Janssen a ciudadanos de 60 a 69 años nel avilesín Hospital Universitariu San Agustín la selmana pasada.