Alcoa algama un prealcuerdu con Parter que nun presta a los trabayadores d’Avilés

|
Marcha trabayadores d'Alcoa a Madrid en Medina del Campo

La multinacional estauxunidense Alcoa anunció esti martes un prealcuerdu col fondu suizu Parter Capital que nun presta a los trabayadores d’Avilés, que prefieren la ufierta presentada pola alemana Quantum pa la factoría asturiana. La operación tien el preste del Ministeriu d’Industria, Comerciu y Turismu.

Na tarde d’ayeri representantes de los gobiernos d’Asturies y Galicia aconceyaron nel ministeriu con miembros de Parter Capital pa conocer de primer mano los planes del grupu suizu pa coles plantes d’Alcoa n’Avilés y A Coruña, xunta na que nun tuvieron presentes los trabayadores. La ufierta presentada comprométese a caltener l’emplegu nos dos años próximos, momentu nel que revisará la situación en función del preciu de la lletricidá del momentu.

El prealcuerdu nun va suponer remuneración dalguna a la empresa estauxunidense, que, por contra, aforrará los costos de los despidos y del zarru de les instalaciones. Alcoa apuntó que pa zarrar la negociación va ser necesario’l preste de los trabayadores, que nel casu de los asturianos nun tien.

El Comité d’Avilés, con representantes visitando les plantes de Quantum d’Alemaña y Italia, con una impresión bona, refuga la opción suiza y defende l’alemana, centrada namái na planta avilesina, que nun fai depender los puestos de trabayu del costu de la enerxía y considera más creíble. Nuna nota de prensa asoleyada ayeri, “llamenta fondamente que’l Ministeriu d’Industria, Comerciu y Turismu tea actuando de forma unillateral anunciando y bendiciendo alcuerdos que son desconocíos dafechu polos trabayadores d’Avilés” y pide “que se retome, sobre manera a partir de les visites a les plantes de Quantum en Hannover, Fussina y Roma, la propuesta d’esti grupu inversor p’Avilés”.

El presidente de Federación Asturiana de Empresarios (FADE), Belarmino Feito, tamién ve más solidez na ufierta alemana. Mentes, los representantes de los trabayadores de la planta d’A Coruña afirmen tar sorprendíos pola posición de los asturianos yá que de primeres la ufierta de Quantum diba sólo pa la d’Avilés, anque nes hores últimes dende’l Gobiernu d’Asturies apuntóse que’l fondu alemán ta en condiciones de presentala pa les dos factoríes.

En marcha a Madrid

Mientres se desendolquen acontecimientu, un piñu d’emplegaos d’Alcoa sigue cola so marcha hacia Madrid, con llegada prevista pal llunes con una gran manifestación convocada peles cais de la ciudá hasta la sede ministeriu. Güei cubrió la sétima etapa de les treces previstes, con final en Medina del Campo.

Na imaxe, trabayadores de la planta asturiana d'Alcoa na entrada de Medina del Campo camín de Madrid.

Contador Estadistiques