La llingua (asturiana) nun descansa esta fin de selmana

Esta fin de selmana Asturies concentra delles actividaes al rodiu l'asturianu qu'enllacen trés díes nos que nun vamos poder dexar d’usar la llingua (asturiana) en nengún momentu. L’aniversariu de la Tertulia Malory, la folixa de La Quintana, la esposición ‘Voces’, el Conciertu pola Oficialidá y el Día de la Reciella permítenlo.

Esti maratón en llingua asturiana que nos atopamos nesti comienzu d’ochobre bien podría comenzar en L’Entregu cola primer actividá d’un eventu que se noma precisamente ‘Maratón Malory’ y col que la Tertulia Malory celebra los sos venti años de vida. A les 16.30 hores arranca una tertulia lliteraria abierta na cervecería Tom Malory, cola posibilidá depués de disfrutar de la esposición '20 años de Tertulia Malory', na que van poder vese dibuxos, llibros y otres pieces venceyaes cola vida de la tertulia como una de les medayes que s'entreguen a los ganadores del Premiu Malory al Meyor Llibru n’Asturianu, que s’inaugura a les 18 hores na Casa Cultura.

Darréu pue garrase carretera hasta Xixón pa disfrutar de la folixa d’entamu del cursu de la Escuela de Música Tradicional La Quintana, que va tener como sede dende les 19 hores Sestaferia. Ún de Grao, cola so propuesta novedosa al rodiu la tonada, y les Pandeperres, a les 20 hores, van tocar nuna fiesta que va allargase con escenariu abiertu y na que va haber una cena ‘de traxe’.

Visita guiada de baldre a ‘Voces’

La mañana del sábadu ye un bon momentu pa disfrutar de la completa esposición ‘Voces. La llingua n’Asturies al traviés de los sieglos’, coordinada por Xulio Viejo cola participación de Ramón d’Andrés y Roberto González-Quevedo na parte académica de la mesma, que ta estos díes nel Muséu Arqueolóxicu d’Asturies. A les 12 hores, Denis Soria pon una visita guiada de baldre a l’amuesa, pa lo que ye necesario acutar plaza al traviés del corréu electrónicu splnormalización@asturias.org o del teléfonu 985.10.67.41.

Una bona xinta n’Uviéu, o yá en Xixón, pue servinos pa garrar fuercies pa lo que se vien pela tarde. El Parque Inglés –anguaño nomáu Parque de los Hermanos Castro– de la villa bañada pel Cantábricu acueye la trentena edición del Conciertu pola Oficialidá, una gran folixa reivindicativa con más d’ocho hores de música en llingua asturiana.

A les 18.30 hores abre les sos puertes la carpa instalada nel llugar, pa comenzar coles actuaciones a les 19 hores Ún de Grao. L-R, Corquiéu, Tejedor, N’Arba, Skama la Rede, Dixebra y La Tarrancha, nesti orde, van intercambiase nos dos escenarios instalaos pola Xunta pola Defensa de la Llingua Asturiana, que lleven dos nomes bien significativos: ‘Yá’ y ‘Agora’.

Otra posibilidá ye pasar pela ‘Maratón Malory’, una gala que dende les 19.30 hores nel Teatru Municipal de Samartín del Rei Aurelio va contar coles actuaciones musicales de Nuberu y la coral ¿Y por qué non?, monólogos teatrales, proyeiciones de montaxes audiovisuales y dalguna qu'otra sorpresa, y depués tirar pa Xixón pal fin de folixa del Conciertu pola Oficialidá.

A correr pol asturianu

El domingu ye’l meyor día pa disfrutar en familia y el Muséu del Pueblu d’Asturies, onde va desendolcase’l VI Día de la Reciella, l’escenariu afayadizu. Conciertos, talleres y xuegos van alternase mientres tol día, dende les 11 hasta les 19 hores, siempre col asturianu como llingua vehicular.

La salida del III Entaína, la carrera de relevos ente güelos, padres, fíos y nietos que simboliza la tresmisión xeneracional del idioma, va abrir la xornada, nel que destaca un conciertu de Skama la Rede (13 hores), una amuesa de baloncestu col Teslacard Círculo (13.30 hores), un karaoke de ‘Bestiariu’ y cantares pa la reciella (16 hores) y l’actuación de Pop Piquiñín (19 hores), amás de una gran xincana col Monino Tamarino.

La Danza Prima, a les 19 hores, ye’l meyor pieslle pa una fin de selmana bien prestosa nos que nun vamos dexar descansar la llingua.