"Estos 30 años demuestren que la reivindicación llingüística nun ye una moda; nun vamos parar hasta que se solucione la cuestión”, diz la XDLA

|
Carlos Pulgar y Xune Elipe XXX Conciertu pola Oficialidá

Esti sábadu celébrase en Xixón la trentena edición del Conciertu pola Oficialidá qu’entama la Xunta Pola Defensa de la Llingua Asturiana (XDLA). “Estos 30 años demuestren que la reivindicación llingüística nun ye una moda; nun vamos parar hasta que se solucione la cuestión”, afirmaron Carlos Pulgar y Xune Elipe.

El voceru nacional del coleutivu cívicu y el cantante de Dixebra, de manera respeutiva, entamaron güei una rueda de prensa pa dar a conocer los detalles d’esti festival de música en llingua asturiana retrasáu a la seronda “poles obligaciones del calendariu reivindicativu”, esto ye la organización de les manifestaciones del 21-A y del Día de les Lletres Asturianes, nun momentu nel que la oficialidá ta marcada en collorao na axenda política de toles formaciones parllamentaries. “Hai dos escenarios, ‘Yá’ y ‘Agora’, que lleven esi nome porque la oficialidá tien que llegar yá y agora. Nun se pue depender de les cuestiones internes de los partíos cuando falamos d’una falta d’un derechu demandáu por gran parte de la ciudadanía”, apuntó Pulgar.

Cuestionáu pola posibilidá que planteguen Podemos y Ciudadanos d’abrir una reforma del Estatutu d’Autonomía pa quitar los aforamientos, aseguró que “la única cuestión estatutuaria con una demanda na cai dende hai más de 30 años, dende la propia creación del Estatutu, ye la de la oficialidá”. Daniel Ripa, nuna rueda de prensa conxunta cola diputada Diana Sánchez esta mesma mañana, abrió la posibilidá a la FSA y IX d’introducir l’asturianu como llingua oficial nel Estatutu nesta llexislatura, mentes que la naranxa refugó esta fórmula xurídica y afaló a desenvolver la Llei d’Usu y Promoción del Bable/Asturianu.

Sobre’l conciertu, Pulgar destacó que se trata “non sólo d’una actividá musical, sinón d’una actividá comunitaria; un llugar de socialización al rodiu de la llingua asturiana”. Asina, señaló que munches persones se conocieron en dalguna de les ventinueve cites anteriores, comenzando asina nel activisimu o afitando rellaciones d’amistá, “inclusive de pareya, pareyes que van venir el sábadu colos sos fíos”.

El primeru, n’Avilés

Un ambiente especial el que tien el Conciertu pola Oficialidá y al que siempre, a esceición de trés contaes ocasiones, ayudó la presencia de Dixebra. Elipe, qu’acudió a la cita colos medios en representación de los grupos participantes, foi ún de los impulsores del eventu qu’echó a andar hai trés décades n’Avilés a partir de músicos llocales perteneciente a la XDLA, “como nosotros, Balandrán, la Banda Gaites Úxica o Trébole”.

“Víamos necesario aportar a la reivindicación dende la nuesa estaya, de manera altruista, y asina echó a andar el Conciertu pola Oficialidá, qu’agora ye’l festival más llonxevu de los que se faen n’Asturies, pel que pasó tola escena n’asturianu”, recuerda’l cantante. Un eventu que sigue en pie gracies al enfotu de los músicos, qu’actuén de manera desinteresada “y son una parte activa y dinámica de la reivindicación llingüística”.

El sábadu, dende les 19 hores –l’apertura de puertes ye a les 18.30 hores–, y hasta más allá de les 3 de la madrugada, van pasar pelos dos escenarios de la carpa instalada nel Parque Inglés –anguaño nomáu Parque de los Hermanos Castro– ochos grupos que “conformen un cartelu irrepetible”. Va encargase d’abrir les actuaciones Ún de Grao, pa depués dar pasu, nesti orde, a L-R, Corquiéu, Tejedor, N’Arba, Skama la Rede, Dixebra y La Tarrancha.

“La escena musical en llingua asturiana, nun país tan pequeñu, cola falta d’infraestructures esistente y la falta d’apoyu mediáticu y de les alministraciones, ye un milagru”, afirma Elipe, qu’añade que la so esistencia “ye frutu del trabayu de los músicos, casi siempre de manera altruista”.

Venta d’entraes

El preciu de les entraes ye de 8 euros de manera anticipada y de 10, na puerta, y tán a la venta nos siguientes puntos: Trisquel y Canteli, en Xixón;  L’Esperteyu y Mala Strana, n’Uviéu; El Cafetón, n’Avilés; L’Abellugu, en Mieres; La Palmera, en La Pola Ḷḷena; CSA La Semiente, en L’Entregu; Creisi, en Candás; El Cuévano, en La Pola Siero; Llibrería Las Dos Vías, en Grau; y l’Azul, en Cangas.

Na semeya, Pulgar y Elipe.

Contador Estadistiques