La Tertulia Malory cumple venti años

Va celebrar esti aniversariu con delles actividaes esta fin de selmana.

La Tertulia Malory cumple venti años de vida. Creada n'ochobre del 1998 a partir d'un grupu d'escritores que s'axuntó nos talleres lliterarios que punxo'l profesor Benigno Delmiro na biblioteca de L’Entregu, poco a poco foi medrando cola incorporación de persones nueves que tolos vienres aconceyen na cervecería Tom Malory pa falar y aldericar sobre llibros y lliteratura.

Pa conmemorar estes dos décades, los participantes anguaño na nomada Tertulia Malory, conocida fuera de la cuenca'l Nalón nestos últimos tiempos pola entrega dende'l 2012 d'un premiu al meyor llibru n'asturianu espublizáu l'añu anterior, entamen ente güei y el domingu delles actividaes baxo'l nome de Maratón Malory. A les 16.30 hores va arrancar con una terturlia lliteraria abierta na propia cervecería.

A les 18 hores va inaugurase na Casa Cultura L'Entregu la esposición '20 años de Tertulia Malory', na que van poder vese dibuxos, llibros y otres pieces venceyaes cola vida de la tertulia como una de les medayes que s'entreguen a los ganadores del Premiu Malory al Meyor Llibru n’Asturianu. A les 20.30 hores la cita va ser otra vuelta na cervecería Tom Malory, onde s'iniciará una K-charrada Poética con micrófono abiertu, a la que tán convidaes a participar toles persones que lo deseen.

El sábadu, día grande

L'espectáculu Maratón Malory va celebrase'l sábadu, día grande de les celebraciones. A les 19.30 hores nel Teatru Municipal de Samartín del Rei Aurelio, tamién en L’Entregu y con entrada llibre, va entamase una gala heteroxénea nos sos conteníos, con actuaciones musicales de Nuberu y la coral ¿Y por qué non?, monólogos teatrales, proyeiciones de montaxes audiovisuales y dalguna qu'otra sorpresa.

Amás, mientres l'actu va presentase'l númberu 5 de la revista 'Reciella Malory', na que s'inclúin testos de dalgunos de los nomes más importantes de la lliteratura asturiana contemporánea, como Xuan Bello, Lourdes Álvarez, Antón García, Vanessa Gutiérrez, Milio Rodríguez Cueto o Consuelo Vega, dalgunos d'ellos ganadores del premiu de la tertulia. Los actos conmemorativos del venti aniversariu van finar el domingu, a les 13 hores, con un Vermú Lliteriariu nel Tom Malory.