La gala del Premiu al Meyor Cantar va celebrase n’Avilés el día 29

|
Banga Gaitas Trasno na gala del Premiu al Meyor Cantar 2016

Cuatro son los aspirantes a llevar el X Premiu al Meyor Cantar, que nesta ocasión va celebrase nel avilesín Teatru Palaciu Valdés el día 29. El xuráu del concursu escoyó a Hoboken Band, Luis Núñez y los Folganzanes, Odón del Paganéu y Bras Rodrigo como finalistes.

Anque les bases señalaben que’l númberu d’intérpretes non sería inferior a cinco, finalmente van ser cuatro los grupos o músicos que van defender en direuto los sos temes como’l meyor cantar en llingua asturiana y gallego-asturiano del añu 2016. El tema ganador va llevar una escultura orixinal y esclusiva d’un o una artista de prestixu reconocíu, amás d’un compromisu de promoción del tema en medios de comunicación y eventos qu’entame’l Gobiernu.

‘La ñeve y la esmeralda’, con lletra y música de Núñez, ye la pieza que van tocar Luis Núñez y Los Folgazanez, mentes que Bras Rodrigo va llevar al Palaciu Valdés ‘Naquel malecón’. Hoboken Band, pela so parte, va interpretar ‘Sonrises nel cielu’, con lletra y música de César González Herrería, y Odón del  Paganéu ‘Soi ya vengu de Tinéu / La inconformidá’.

La gala de la final va emitise per TPA y va contar con un conciertu d’Anabel Santiago, ganadora de la edición anterior col tema ‘La lloca’, mientres el tiempu nel que xuráu, formáu por especialistes en música y llingua asturiana, decida’l cantar ganador.

Contador Estadistiques