La décima edición del Premiu al Meyor Cantar yá ta en marcha

La Conseyería d’Educación y Cultura ta acabante de convocar una edición nueva del Premiu al Meyor Cantar, la décima, recuperando asina esti gallardón la normalidá depués del parón del 2015. El plazu pa presentar temes fina’l día 30.

El Premiu al Meyor Cantar tien como oxetivu visibilizar la música n’asturianu y gallego-asturiano, al empar que buscar fomentar la creación musical. El concursu premia al tema más destacáu que s’editara mientres l’añu anterior, esto ye 2016, canción qu’ha de ser orixinal, quedando asina escluyíes les pieces tradicionales yá esistentes, les versiones o les adaptaciones d’otros idiomes.

Ente tolos cantares que vayan a concursu, un xuráu va escoyer a los finalistes, nun númberu non inferior a cinco, que van participar na gala onde va decidise’l ganador final tres les actuaciones en direuto de tolos candidatos. Ésti va llevar como recompensa “una escultura orixinal y esclusiva d’un o una artista de prestixu reconocíu”, amás d’un compromisu de promoción del tema en medios de comunicación y eventos qu’entame’l Gobiernu. Sicasí, el premiu nun recueye, como nel pasáu, la participación nel Liet International, el festival européu de la canción en llingües minorizaes.

El plazu pa presentar pieces va zarrase’l 30 d’esti mes, mentes qu’entovía nun ta confirmada la fecha y el llugar onde va celebrase la gala final. Na edición del añu pasáu la ganadora foi Anabel Santiago, con ‘La lloca’.