La FSA celebra’l so congresu de la renovación

|
Adrián Barbón y equipu trunfu primaries

Dende esti vienres y hasta’l domingu, el Palaciu d’Esposiciones y Congresos d’Uviéu va acoyer el trentenu segundu congresu de la FSA. L’apoyu a la oficialidá del asturianu y gallego-asturiano va votase nel mesmu depués de que 23 agrupaciones, que sumen el 75 por cientu de la militancia, sofitaran una enmienda al respeuto.

Adrián Barbón va estrenar nesta cita’l so cargu de secretariu xeneral tres superar nes primaries del domingu a José María Pérez López con un 60,58 por cientu de los votos. L’alcalde de Llaviana sustitúi nel cargu a Javier Fernández, que decidió nun presentase a la reeleición.

L’actual presidente d’Asturies va intervenir nel congresu de la renovación de la Federación Socialista Asturiana (FSA) a les 17.30 hores, media hora depués de la so apertura oficial y tres les pallabres de José Luis Ábalos, secretariu d’Organización del PSOE. Darréu va aldericase sobre la xestión actual y va votase la mesma, pa finar cola constitución de les comisiones que van trabayar mañana.

Oficialidá

El posible apoyu a la oficialidá del asturianu y gallego-asturiano va aldericase y votase dientro de la comisión ‘Asturias inclusiva y garante de derechos’ gracies al trabayu de busca de consensu fechu pola plataforma ‘Socialistes pola Oficialidá’, que consiguió sacar alantre una enmienda sofitada poles Mocedaes Socialistes d’Asturies y la Sectorial Autonómica d’Educación, y un total de 23 agrupaciones –sumáronse nos díes últimos Castropol, Avilés, Castrillón y Gozón, con una redaición diferente– que representen al 75 por cientu de la militancia: Xixón, Uviéu, Llangréu o Mieres. Llaviana, Corvera, Samartín del Rei Aurelio, Siero, Nava, Candamu, Morcín, Parres, Llanera, Ḷḷena, Sariegu, Ayer, Sobrescobiu, Villaviciosa y Casu.

María Luz Pontón va encargase de defender la propuesta na Comisión, qu’ha d’algamar un 20 por cientu del apoyu de los delegaos que participen nella pa votase na mañana del domingu. Nel casu de superar el 50 por cientu, quedaría aprobada darréu.

La enmienda pa que la FSA incluya “un modelu d’oficialidá d’aplicación progresiva y acordies coles circunstancies sociollingüístiques y a les necesidaes culturales d’Asturies” ente los sos principios cuenta col sofitu del eurodiputáu Jonás Fernández y de la corriente interna Izquierda Socialista de Asturias. Esta mañana, na so cuenta en Twitter, el direutor xeneral de Deportes, José Ramón Tuero, tamién amosó’l so apoyu a la mesma.

Otra manera, les organizaciones Iniciativa pol Asturianu y la Xunta pola Defensa de la Llingua Asturiana foron convidaes de manera oficial a l’apertura y zarru del Congresu, ésti últimu’l domingu al meudía, cuando tán previstes les intervenciones de Barbón y Adriana Lastra, vicesecretaria xeneral del PSOE.

Contador Estadistiques