El protagonismu del asturianu nel Día de les Escritores encabrita a la diputada de VOX

|
Participantes nel Día de les Escritores

Sara Álvarez Rouco llevantóse del actu Xunta Xeneral, que calificó de sectarista por nun contar colos homes, mientres la intervención de Marta Mori, vicepresidenta de l'ALLA.

El Día de les Escritores, que se realiza con calter añal dende'l 2016 el llunes más cercanu al 15 d'ochobre, y qu'esti añu fíxose nel Parllamentu asturianu, busca reivindicar el llabor y el legáu de les escritores a lo llargo de la historia a partir de la llectura de les sos obres, un espíritu que paez nun cuadrar na mentalidá de la diputada de VOX, que dixo sofitalo anque "nos parece que es sectarismo totalmente porque no es un acto también de escritores". Esti fechu, sumao a les numberoses llectures en llingua asturiana de los participantes, terminó d'encabritar a Álvarez Rouco, hasta'l puntu de marchar nel momentu qu'intervenía Mori.

Tres la finalización del actu dio los sos motivos: "Se están utilizando unos espacios aquí en la Junta para dar un carácter político a un acto claramente institucional. Se está utilizando el bable en un entorno en el que no hay coofiacialidad". Llueu, nuna nota de prensa, criticó l'emplegu del asturianu por Mori y apuntó que se marchó al espresar ésta'l so deséu de que "en un futuro próximo se permita el uso de la Llingua en todas la situaciones públicas, privadas, así como en la Junta General del Principado".

Les pieces escoyíes

La vicepresidenta de l'Academia de la Llingua Asturiana (ALLA) lleó 'Cuando pienso tierra escribo azul', de Teresa Lorences, mesma autora qu'escoyó la conseyera de Cultura, Política Llingüística y Turismu, Berta Piñán, con 'Siguiendo a Lot'. De Piñán recitó'l presidente Adrián Barbón 'Lección de gramática', mentes que tamién sonó l'asturianu de la boca del rector de la Universidá d'Uviéu, Santiago García Granda, con 'Pentagrama', d'Ángeles Carbajal, y de María Esther García López, presidente de l'Asociación d'Escritores d'Asturies, con 'A la gueta l'amor', un cachu del so llibru de rellatos.

Semeya obra d'Armando Álvarez.

 

 

Contador Estadistiques