L’Arribada abre’l plazu pa presentar candidatures pa los Timón 2016

Fina’l 10 d’avientu pa les trés categoríes. Nesta edición aspiren al gallardón los escritores nacíos nel añu 1966 o enantes.

Los Premios Timón creáronse nel 2007 col oxetivu de “reconocer la trayectoria creativa de los escritores d’Asturies”. Nun primer momentu, taben centraos nos autores qu’emplegaben la llingua asturiana o eonaviego, anque dende’l 2010 sumóse una segunda categoría p’aquellos escritores del país qu’usaren el castellanu. Finalmente, nel 2013, l’Asociación Cultural L’Arribada sumó un Timón nuevu, el de Cultura Asturiana, nesti casu destináu a “asociaciones, sociedaes, fundaciones ya instituciones con sede n’Asturies que tengan como fin la conservación y promoción de la identidá cultural de nueso, y a persones con una trayeutoria valoratible nesi ámbitu”.

Dende ayeri, y hasta’l 10 d’avientu, ye posible presentar candidatures a les tres categoríes nel corréu electrónicu larribada@gmail.com. Éstes pueden facese de manera individual o en nome d’un coleutivu. Nesta ocasión aspiren a los Timón lliterarios los autores nacíos nel 1966 o enantes.

Trés xuraos valorará ente toles candidatures presentaes a la persona o entidá merecedora del X Premiu Timón p’autores en llingua asturiana y eonaviego, del VII Premiu Timón p’autores asturianos en llingua castellana y del IV Premiu Timón de Cultura Asturiana. Los ganadores recibirán una obra del ceramista y escultor xixonés Jesús Castañón na XI Vagamar.

Palmarés

Los ganadores del Timón n’asturianu y eonaviego son: Nené Losada Rico (2007),  Xuan Xosé Sánchez Vicente (2008),  Manuel García ‘El Galano’ (2009), Roberto González-Quevedo (2010), Vicente García Oliva (2011),  Antón García (2012), Miguel Rojo (2013),  Xosé Bolado (2014) y Esther Prieto (2015). Mentes, llevaron el d’autores asturianos en castellanu Luis Fernández Roces (2010),  Juan Méjica (2011),  Fernando Menéndez (2012), Gonzalo Suárez (2013),  Carmen Ruiz-Tilve (2014) y Francisco García Pérez (2015).

Por último, nes trés ediciones del Timón de Cultura Asturiana resultaron condecoraos  l’Asociación Cultural Ensame Sidreru (2013), la Xunta pola Defensa de la Llingua Asturiana (2014) y l’Asociación pola Recuperación de los Sidros y les Comedies ‘El Cencerru’ (2015).