Los Timón 2016, con trés candidatos por categoría

El día 26 conoceráse’l ganador de caúna de les trés estayes de los Premios Timón. Estos gallardones entrégalos l’Asociación Cultural L’Arribada, que nestos díes ta celebrando una Vagamar especial baxo’l nome de ‘10 años de L’Arribada’.

A diferencia d’ediciones anteriores de los premios, cuando’l xuráu escoyía ente una terna de nominaos muncho más amplia, nesta ocasión la organización decidió facer una seleición previa de trés nominaos ente toles candidatures presentaes. Asina, el sábadu 26 na xornada cabera de los 10 Años de L’Arribada, fadránse públicos los ganadores nun actu que va principar al meudía nel Muséu Casa Natal de Xovellanos.

Los trés nominaos pal X Premiu Timón p’autores en llingua asturiana y eonaviego son Esther García López, Xulio Berros y Ánxel Álvarez Llano, mentes que pal VII Premiu Timón p’autores asturianos en llingua castellana aspiren al gallardón Pilár Sánchez Vicente, Olvido García Valdés y Herme G. Donis. Nesta ocasión los Timón lliterarios taben llendaos a escritores nacíos nel 1966 o años anteriores.

Pela so parte, Ramón d'Andrés, la Wikipedia n'asturianu y Iniciativa pol Asturianu son los candidatos al IV Premiu Timón de Cultura Asturiana, destináu a “asociaciones, sociedaes, fundaciones ya instituciones con sede n’Asturies que tengan como fin la conservación y promoción de la identidá cultural de nueso, y a persones con una trayeutoria valoratible nesi ámbitu”. Los ganadores en toles categoríes recibirán una obra del ceramista y escultor xixonés Jesús Castañón.

Presentación de ‘Yo taba ellí’

Precisamente una de les nominaes, García López, protagoniza la xornada de güei de los 10 Años de L’Arribada. L’autora valdesana presenta a les 20 hores na xixonesa La Buena Letra el so llibru ‘Yo taba ellí’, editáu por Trabe. Mañana, la Gastrocervecería Tres va acoyer a la mesma hora la yá tradicional Xeremandía de L’Arribada, cola participación nesta ocasión de les asociaciones Encadenados y Versos Libres.