La Vagamar celebra’l so décimu aniversariu con un abanicu ampliu de propuestes

|

La primer xornada de l’actividá de l’Asociación Cultural L’Arribada va celebrase’l sábadu cola proyeición de trés películes n’asturianu. Baxo’l nome de ’10 años de L’Arribada’, esti eventu busca facer analís de la evolución cultural de Xixón y Asturies.

“L'Arribada ye un proyectu de difusión que nuna década d'actividá cuntó con varies decenes de miles d'asistentes a los actos que se programaren, y nos que tienen intervenío cientos de participantes. La Vagamar lliteraria, una de les sos estayes, cumple'l décimu aniversariu esti añu y, pa celebralo, la nuesa asociación cultural entama un eventu nomáu ‘10 años de L’Arribada’ onde facer analís, ente’l 14 de payares y el 26 d’avientu, de la evolución cultural de Xixón y Asturies per aciu d'un abanicu ampliu de propuestes en forma d’alcuentros con lliteratos y creadores artísticos, proyeiciones, tertulies, presentaciones, conferencies, actos institucionales, actuaciones musicales, y otros”, espliquen dende esti coleutivu.

La primer actividá va tener llugar mañana, dividía en dos sesiones con sede nel salón d’actos del Centru Municipal Integráu Atenéu de La Calzada. Pela mañana, al meudía, neños y mayores van poder disfrutar de la película d’animación ‘Los viaxes de Gulliver’. Yá de tarde, a les 18 hores, van proyeutase los filmes ‘El tercer home’ y ‘La nueche de los muertos vivientes’. El doblaxe de les trés cintes foi obra de Gonzali Producciones.

No que resta de payares y avientu van ser munches les propuestes entamaes por L’Arribada nesta Vagamar tan especial. Ente elles destaquen un homenaxe a la obra cinematográfica documental del director asturianu José Antonio Quirós, del que se verán les películes ‘Solas en la Tierra’ y ‘Gran Casal, me como el mundo’, y una xornada dedicada a Miranda de l Douro, territoriu portugués onde ye oficial una variante del asturlleonés, a la qu'asistirá'l so alcalde, Artur Nunes, xunto col escritor Mário Correia, que presentará'l so llibru ‘José Afonso, andarilho nas Astúrias’. Correia va participar tamién nuna tertulia sobre temes mirandeses onde falará de música y etnografía y fadrá compaña a Alfredo Cameirão (Léngua Mirandesa) y Herminio Bernardo (Historia).

’10 años d’Arribada’ va finar el 26 d’avientu col fallu de los Premios Timón 2016. Nesti enllaz pue consultar el programa de la Vagamar 2015.

Contador Estadistiques