Javier Fernández tira d’hemeroteca pa recorda-y a Coto la postura d’Álvarez-Cascos sobre la oficialidá nel 1998

|
Javier Fernández y el so gobiernu

“Lo primero que se-y ocurrió dicir a vusté ye que miento y, mire, nun miento”, espetó-y Javier Fernández a Cristina Coto, que’l pasáu día 9 negó na Xunta Xeneral que Francisco Álvarez-Cascos y Mercedes Fernández sofitaren nel 1998 una cooficialidá diferida. Darréu lleó una noticia de la época sobre la posición del PP naquel tiempu.

‘Cascos pide a Noval que el PSOE acepte la posible cooficialidad del asturiano’ yera’l títular que’l presidente citó, pa depués afondar nuna noticia que dicía que “el vicepresidente primero del Gobiernu, Francisco Álvarez-Cascos, el presidente del PP en Asturias y senador; Isidro Fernández Rozada ; y la diputada popular Mercedes Fernández se entrevistaron el pasado martes en el Congreso de los Diputados con Luis Martínez Noval, secretario general del PSOE asturiano y diputado, para tratar de convencerle de que apoye en la reforma del Estatuto una vía que permita con posterioridad hacer oficial la lengua asturiana”. “Asina ye cómo vusté diz que los demás mentimos”, finó dirixéndose a la vocera de Foro.

Coto salió’l pasáu día 9 en defensa de Mercedes Fernández y del fundador del so partíu depués de que Javier Fernández recordara-y a la presidenta actual del PP n’Asturies la so postura nel 1998, calificando’l so discursu de “impostáu”. “Vusté, cuando mílitaba col señor Cascos nel mesmu partíu, plantegáronnos a los socialistes un cambiu nel Estatutu pa facer una cooficialidá diferida, de tal manera que nesti momentu esa cooficialidá podría aprobase con 22 como mayoría. Eso nun va ocurrir asina porque’l Partido Socialista nun quixo, de tal manera que na próxima llexislatura tendrán que ser trés quintos los que nel so casu aprueben una decisión como ésta, que me paez trescendente. Yo nun voi tar, vusté sí, pero si sigue asina va tar onde ta, amarrada al duru bancu de la oposición”, dixo aquel día na Xunta Xeneral.

Nuna intervención posterior, la presidenta de Foro, mientres treslladaba delles entruges a Javier Fernández del so grupu parllamentariu, apuntó-y que “sobre la oficialidá diferida que citó enantes aprovechando que nun había turnu de réplica, eso nun ocurrió. Francisco Álvarez-Cascos nunca la propunxo y Mercedes Fernández, tampoco”. La respuesta del xefe del Executivu foi qu’él taba “nel Partido Socialista daquella y yera diputáu nel Congresu y puedo asegura-y qu’asina-y lo dixo lliteralmente al señor Martínez Noval. Ta nos medios de comunicación y voi traye-ylo la vegada próxima”, promesa que cumplió esta mañana.

Declaraciones na radio

Precisamente Álvarez-Cascos trató sobre l’asuntu de la oficialidá esta selmana tres una entruga nuna entrevista nel programa 'Aquí en la Onda Asturias' d'Onda Cero. "La posibilidá qu'esista una oficialidá n'Asturies ye imposible. Ye dalgo inimaxinable", respondió de primeres, pa depués afondar na cuestión.

“El debate ye falso porque nun quieren esplicar qué ye la oficialidá”, apuntó en referencia al modelu que se desea implantar n’Asturies, pa depués afirmar que “los radicales de la oficialidá tan faciendo un flacu favor al asturianu”. Darréu refugó cualquier tipu de obligatoriedá, posicionándose asina en postures averaes a les que caltién Ciudadanos, y criticó la “ultra” del PP cuando “son responsables de la inmersión llingüística en Cataluña”.

Semeya obra d'Armando Álvarez.

Contador Estadistiques