Javier Fernández califica’l discursu de Mercedes Fernández de “impostáu”

La presidenta del PP d’Asturies, Mercedes Fernández, entrugó a Javier Fernández na Xunta Xeneral sobre la oficialidá, que reconoció como un elementu “conflictivu”. El presidente calificó’l discursu de Mercedes Fernández sobre l’asturianu de “impostáu”, recordando-y el so apoyu nel pasáu a una cooficialidá diferida.

Siguiendo cola so campaña d’ataque frontal a la cooficialidá del asturianu, la vocera del PP llevó a la Xunta Xeneral una entruga a Javier Fernández sobre esti asuntu, al que criticó pola so postura frente a lo que considera un problema p’Asturies que refuguen “miles d’asturianos”. “Saltáronnos les alarmes cuando llevamos una propuesta de resolución a esta Cámara contra la cooficialidá. Llevamos una sopresa mayúscula porque contábamos cola coherencia del señor Llamazares, que respeto, y la postura de los partíos novedosos, qu’acepto, pero non cola astención del Partido Socialista Obrero Español, dalgo a lo que vusté ye mui proclive y yo nada, faciendo que los radicales trunfaren nos sos plantegamientos con esti asuntu. Foi un motivu de preocupación y pensamos en ‘vamos a ver si somos quien a paralo’”, esplicó sobre los oríxenes de la so cruzada ‘antibable’.

Consciente de la posición de Javier Fernández, recordó l’episodiu del “diccionariu nel ordenador”, y tres afirmar que “el problema de la cooficialidá ye la obligatoriedá”, pidió-y al socialista “que s’atreva, que caltenga nel so partíu un discursu valiente y que nun permita pasivamente que por 3 votos –en referencia al congresu socialista– se cree un problema qu’Asturies nun tiene y Asturies nun almite”.  El presidente del país, pela so parte, nun se salió del so discursu y calcó en que “yo nun soi partidariu de la cooficialidá, sí d’aplicar la Llei d’Usu y Promoción y l’artículu 4 del Estatutu, y a eso comprometíme cuando me presenté a les eleiciones con un programa eleutoral”.

“El Partido Socialista nel so debate internu decidió apostar pola cooficialidá n’Asturies y lo que fadrá, imaxínome, será, de cara a les próximes eleciones nel so programa, plantegar cómo quier esa cooficialidá y los sos serán candidatos defenderanlo énte los asturianos, un procesu que calificó de “absolutamente democráticu”. Sobre los supuestos grupos minoritarios que’l PP piensa que van garrar fuercia cola cooficialidá, el presidente del país señaló “que siempre los hebo” y habrá xente “que vea l’asturianu non como un elementu de comunicación, sinón como d’identidá”, pa depués apuntar que “la identidá de los asturianos nun pue basase nun elementu tan conflictivu”.

La propuesta d'oficialidá diferida

“Lo qu’a min me preocupa muncho ye que s’use l’asturianu como un elementu de confrontación más allá de lo normal en política”, siguió Javier Fernández, que calificó’l discursu de Mercedes Fernández de “impostáu”. “Vusté, cuando mílitaba col señor Cascos nel mesmu partíu, plantegáronnos a los socialistes un cambiu nel Estatutu pa facer una cooficialidá diferida, de tal manera que nesti momentu esa cooficialidá podría aprobase con 22 como mayoría. Eso nun va ocurrir asina porque’l Partido Socialista nun quixo, de tal manera que na próxima llexislatura tendrán que ser trés quintos los que nel so casu aprueben una decisión como ésta, que me paez trescendente. Yo nun voi tar, vusté sí, pero si sigue asina va tar onde ta, amarrada al duru bancu de la oposición”, aseguró.

Semeya obra d'Armando Álvarez.