Refugaes nel Senáu toles enmiendes de sofitu a l'ALLA nos Presupuestos Xenerales del Estáu

|
Refugaes nel Senáu toles enmiendes de sofitu a l'ALLA nos Presupuestos Xenerales del Estáu

Esti llunes votáronse nel Senáu los Presupuestos Xenerales del Estáu y los grupos que los sofitaron nel Congresu refugaron toles enmiendes pa evitar tener que llevalos otra vegada al Congresu y asina poder aprobalos de manera definitiva. Les trés enmiendes que pidíen perres pa l'ALLA, poro, valtáronse.

Nel Senáu refugáronse los 64 vetos y les 6.119 enmiendes parciales presentaes a los Presupuestos. Ente elles taben 3 presentaes por Compromís, Xuníos Podemos-En Comú-En Marea y PSOE que pretendíen dotar a la institución academica asturiana d'una aportación económica viniente de les cuentes estatales.

Éstes nun contaron col sofitu del PP, con mayoría absoluta na Cámara Alta, nin de los otros partíos que sofitaron los presupuestos nel Congresu, esto ye, Foro, Ciudadanos, Coalición Canaria, UPN y PNV, evitando asina'l trámite de tener que devolver les cuentes al Congresu, onde salieron alantre con una votación mui axustada.

Los pidimientos de 100.000 euros pa l'Academia de la Llingua Asturiana (ALLA) incluyéronse, al igual que'l restu d'enmiendes parciales, en bloques xunto a otres propuestes, inclusive non llingüístiques, lo que llevó, según esplicó'l senador d'esta formación Jon Iñarritu ente les protestes recibíes per redes sociales, a qu'EH Bildu s'astuviera na votación al nun tar d'alcuerdu con munches d'elles. Tamién siguieron esti camín Nueva Canaria y l'Agrupación Socialista de La Gomera.

Mentes, posicionáronse a favor Convergència Democràtica de Catalunya y ERC, amás de los partíos que presentaren les enmiendes.

Contador Estadistiques