Asturies va garrar la xestión del estáu d'alarma al pasar a fase 3

El Ministeriu de Sanidá confirmó qu’Asturies va pasar esti llunes a la fase 3 de la desescalada, la última enantes de la ‘normalidá nueva’ hasta l’afayu d’una vacuna o una tratamientu eficaz contra la COVID-19. Adrián Barbón va garrar la xestión del estáu d’alarma nesti estadiu, nel que nun va haber movilidá ente autonomíes.

Los pidimientos de cambiu de fase de toles comunidaes autónomes foron aceptaes pol ministeriu. Asina, cumpliendo col calendariu de la desescalada, Asturies va avanzar a la 3 xunto con Galicia, Cantabria, Euskadi, Navarra, La Rioja, Aragón, Andalucía, Extremadura y Melilla; les provincies castellano-manchegues de Guadalajara y Cuenca; y les isles que quedaben por dar el pasu en Balears y Canarias, y les trés zones sanitaries catalanes menos afeutaes pola pandemia.

En total, va tar el 52 por cientu de la población del Estáu en fase 3, mentes que’l 48 por cientu restante va tener les restricciones de la fase 2. La Comunidad Valencia, como solicitara, va siguir nesti estadiu xunto con Ceuta y los otros territorios que pidiera avanzar, esto ye, la Comunidad de Madrid, Castilla y Lleón, y les otres árees sanitaries catalanes, incluyida Barcelona hasta agora en fase 1, amás de les provincies castellano-manchegues de Toledo, Ciudad Real y Albacete.

El mandu del estáu d’alarma en fase 3 pasa a ser de les autonomíes, polo que Barbón va ser l’encargáu de xestionar esti procesu. La sesta prórroga del estáu d’alarma fai qu’esta s’allargue hasta’l 21 de xunu, momentu nel que va llegar lo que’l presidente Pedro Sánchez nomó ‘normalidá nueva’, regularizada por un Real Decretu-llei que’l Conseyu de Ministros va aprobar el martes, anque van ser les autonomíes les que decidan cuándo dar el pasu al estadiu final de la desescalada.

Novedaes de la fase 3

El pasu de la fase 3 va llevar a una mengua de les restricciones. Nun va haber franxes horaries acutaes y la hostelería va poder ocupar les sos barres calteniendo les midíes y distancies de seguranza ente veceros, y ampliar les terraces hasta un 75 por cientu.

Amplíense los aforos de velorios hasta les 25 persones, mentes que los cines y teatros van tener disponible agora’l 50 por cientu de la so capacidá, al igual que les tiendes de los centros comerciales. Los clientes d’hoteles van poder facer usu de les zones comunes, anque nunca van poder supera la metá de la so capacidá.

Sobre la movilidá ente territorios, el ministru Salvador Illa confirmó que va ser posible ente provincies d’una mesma comunidá, pero non ente autononíes. Asina, hasta la ‘normalidá nueva’ nun va ser posible que los asturianos puedan viaxar a otros territorios o de recibir visitantes de llugares nesi mesmu estadiu.