González Riaño va poner la conferencia inaugural de les XXXVII Xornaes Internacionales d’Estudiu, que va centrase na oficialidá

|
Cartelu de les XXXVII Xornaes Internacionales d’Estudiu

‘La llingua asturiana nuna perspeutiva d’oficialidá’ ye’l nome de la conferencia inaugural de les XXXVII Xornaes Internacionales d’Estudiu qu’entama l’Academia de la Llingua Asturiana. El so presidente Xosé Antón González Riaño va encargase de ponela.

Va ser a les 13 hores de mañana nel salón d'actos de la Facultá de Filosofía y Lletres de la Universidá d’Uviéu, nel campus d'El Milán, tres l’entamu previstu al meudía y la presentación de la edición dixital del númberu 119 de ‘Lletres Asturianes’ y del 8 de la revista dixital ‘Ciencies. Cartafueyos Asturianos de Ciencia y Teunoloxía’. Na inauguración d’estes prestixoses xornaes, na que participen espertos de dientro y fuera del país, van intervenir tamién José Ramón Obeso, vicerrector d’Investigación de la Universidá d’Uviéu, y José Antonio Gómez Rodríguez, decanu de la Facultá de Filosofía y Lletres.

El restu de ponencies y comunicaciones van desendolcase peles tardes de los trés próximos díes. Juan Pedro Sánchez Menéndez (Université de Neuchâtel) va falar a les 18.45 hores sobre ‘Hispanoamérica, un puzle iberorrománico: la huella asturleonesa en la conformación histórica del español americano’, mentes que’l miércoles a les 16.30 hores Paolo Rosano (Universitat de Barcelona) va tratar del ‘Análisis dialectométrico de la prosodia del asturiano en el ámbito románico: una primera aproximación’, y Elisa Fernández Rei (Universidade de Santiago de Compostela) de ‘El asturiano y las áreas geoprosódicas del occidente ibérico’ a les 19 hores.

Na xornada cabera, a les 16.30 hores Alfredo Martínez-Expósito (The University of Melbourne) va ufrir la conferencia ‘Cuestiones de imagología en el cine hecho en Asturias en el siglo XXI’, pa poner el ramu a les XXXVII Xornaes Internacionales d’Estudiu Fernando Sánchez Miret (Universidad de Salamanca) a les 19 hores con la intervención ‘¿Cómo se ha estudiado la metafonía asturiana?’.

Catorce comunicaciones

Ente dambes ponencies diares, quince investigadores van protagonizar catorce comunicaciones de delles temátiques al rodiu la llingua asturianu. Asina, nesta ocasión van participar Aurelio González Ovies, Llucía Menéndez Menéndez, Severino Antuña, Christian Fernández Chapman, Alejandro Junquera y María Moro, mañana; Carmen Muñiz Chacón, Alberto Gómez Bautista, Rosabel San Segundo y Víctor Suárez, el miércoles; y Próspero Morán y Ylenia López Rubín, Xuan Xosé Lajo, Inaciu Galán y Claudia Elena Menéndez Fernández, el xueves.

Contador Estadistiques