Segundu día de les XXXVII Xornaes Internacionales d'Estudiu

|
Ana María Cano y Xosé Antón González Riaño XXXVII Xornaes Internacionales d'Estudiu

El martes abriéronse con una ponencia del presidente de l'ALLA, Xosé Antón González Riaño, que cifró nun 0,5 por cientu el costu presupuestariu de la oficialidá.

La segunda sesión de XXXVII Xornaes Internacionales d'Estudiu, qu'entama l'Academia de la Llingua Asturiana (ALLA) nel salón d'actos de la Facultá de Filosofía y Lletres de la Universidá d’Uviéu, va comenzar a les 16.30 hores cola conferencia del profesor Paolo Roseano, de la Universitat de Barcelona, titulada 'Análisis dialectométrico de la prosodia del asturiano en el ámbito románico: una primera aproximación'. Tres un alderique posterior, al rodiu les 17.30 hores, Carmen Muñiz Cachón va poner la primer de les cuatro comunicaciones del día, entitulada 'Cambéu llingüísticu n'asturianu actual: sonorización d'oclusives sordes'.

Darréu va ser el turnu d'Alberto Gómez Bautista, con 'A palatalização de l- inicial latino en mirandés'; Rosabel San Segundo, con '¿Cuánto ye una gota? Análisis sintácticu-pragmáticu'; y Víctor Suárez, con 'El cine nes clases de llingua asturiana: Una aplicación didáutica'. La xornada va pesllase a les 19 hores cola ponencia 'El asturiano y las áreas geoprosódicas del occidente ibérico', a cargu d'Elisa Fernández Rei, profesora de la Universidade de Santiago de Compostela.

Hasta mañana

Con trés díes de llargor, les XXXVII Xornaes Internacionales d'Estudiu comenzaron ayeri cola presentación de la edición dixital del númberu 119 de ‘Lletres Asturianes’ y del 8 de la revista dixital ‘Ciencies. Cartafueyos Asturianos de Ciencia y Teunoloxía’, depués de que José Ramón Obeso, vicerrector d’Investigación de la Universidá d’Uviéu, y José Antonio Gómez Rodríguez, decanu de la Facultá de Filosofía y Lletres, s'encagaren d'abriles oficialmente xunto con Xosé Antón González Riaño. El presidente de l'ALLA punxo la ponencia inaugural, que llevaba'l títulu de ‘La llingua asturiana nuna perspeutiva d’oficialidá’.

Introducíu pola so antecesora nel cargu, Ana María Cano, González Riaño repasó'l momentu actual y el modelu que se propón dende l'institución académica. Asina, analizó un testu llegal afayadizu pal asturianu y el gallego-asturiano na reforma necesaria del Estatutu d'Autonomía pa declarar la oficialidá, dando-y el so preste al propuestu por Podemos y Izquierda Xunida.

Darréu afitó nun 0,5 por cientu'l costu presupuestariu que supondría y recordó los ingresos que vendríen del Gobiernu estatal y el reblagu que supondría pa la industria cultural del país, ente otres munches cuestiones.

Contador Estadistiques