Les XXXVII Xornaes Internacionales d'Estudiu viven la so sesión última

La imagoloxía nel cine asturianu actual y la metafonía protagonicen les dos ponencies.

Les XXXVII Xornaes Internacionales d'Estudiu, qu'entama l'Academia de la Llingua Asturiana (ALLA) dende'l martes nel salón d'actos de la Facultá de Filosofía y Lletres de la Universidá d’Uviéu, piesllen güei con una sesión que va comenzar a les 16.30 hores cola conferencia ‘Cuestiones de imagología en el cine hecho en Asturias en el siglo XXI’, a cargu d'Alfredo Martínez-Expósito, profesor de The University of Melbourne. Tres un alderique, a les 17.30 cinco investigadores van presentar cuatro comunicaciones d'un llargor d'unos quince minutos caúna.

La primera va ser 'El Plan Pilotu Esperimental de Promoción del Usu del Asturianu y les actitúes llingüístiques na so implantación nel cursu 2017-2018', a cargu de Próspero Morán y Ylenia López Rubín. Darréu'l turnu va ser pa Xuan Xosé Lajo, que va falar de 'La 'normalización espontánea' de la llingua asturiana: un casu concretu', pa siguir con Inaciu Galán, que va afondar en 'El tratamientu del asturianu nel Instituto de Estudios Asturianos (1945-1978)', y con Claudia Elena Menéndez Fernández, que va tratar la 'Onomástica de los neños abandonaos n'Asturies. Una muestra del sieglu XVIII'.

Va poner el pieslle a esta edición de les xornaes Fernando Sánchez Miret, profesor de la Universidad de Salamana, cola intervención ‘¿Cómo se ha estudiado la metafonía asturiana?’. Detrás quedarán trés sesiones con seis ponencies y catorce comunicaciones na que participaron espertos asturianos y otros procedentes d'universidaes suices, catalanes, gallegues, australianes o lleoneses.

Na semeya, la gallega Elisa Fernández Rei intervién na ponencia que zarró la segunda sesión de les xornaes.