Gil dimite y entrega la so acta de diputada

La vocera de Podemos toma esta decisión tres "una reflexón, personal y política, fonda".

Lorena Gil abandona la política. La candidata a la presidencia del país por Podemos dimite como vocera del grupu parllamantariu y entrega la so acta de diputada.

"Foi una decisión mui difícil, por munches razones, de manera especial porque lo último que querría ye defraudar la confianza y les espeutatives de los que m'avalaron col so sofitu y tuvieron emburriando tou esti tiempu. Sicasí, la mesma honestidá y coherencia coles qu'intenté facer el mio trabayu, y que considero fundamentales na política como na vida, son les máximes que me lleven a tomar esta determinación", esplica nuna carta asoleyada anueche.

"A lo llargo d'esti tiempu'l mio oxetivu nun foi otru", sigue, "qu'asegurame de que cumplíamos el compromisu que firmamos con miles d'asturianes y asturianos nel 2015 y qu'anovamos nel 2019. Hasta aquí creo que fui quien a cumplilo; sicasí, cada vegada son más los obstáculos pa garantizar un trabayu políticu al altor de los principios que, al mio xuiciu, esixe esi compromisu, y llegó'l momentu d'asumir que nun me ye posible dar un pasu más ensin correr el riesgu d'entamar a frayalu".

Diputada dende'l 2015, llideró la candidatura de Podemos nes eleiciones de 2019, cuando la formación pasó de 9 a 4 escaños. Agora Gil torna al so puestu de trabayu nuna multinacional asitiada n'Asturies, algamando'l derechu a l'acta la númberu 5 de la llista, Jara Cosculluela.