Lorena Gil: “Podemos ye un proyeutu d’Asturies dende Asturies y p’Asturies ensin sucursalismos nin hipoteques”

|
Lorena Gil: “Podemos ye un proyeutu d’Asturies dende Asturies y p’Asturies ensin sucursalismos nin hipoteques”

280 midíes "sobre les bases de la defensa de la tierra, la rexeneración democrática y la xusticia social" presenta Podemos a les asturianes y asturianos pa llevantar Asturies y ameyorar la vida de los sos ciudadanos. Lorena Gil Álvarez (Xixón, 1975) va encargase de defendeles dende'l domingu na Xunta Xeneral.

¿Qué espeutatives tien Podemos Asturies el 26-M?

Les de facer llegar les nuestres propuestes al mayor númberu de persones pa que puedan figuranos gobernando y pa que nos dean esti domingu’l so sofitu pa esi cometíu.

Les encuestes dan una mayoría a la izquierda, con unos númberos pal so partíu asemeyaos a los del 2015. ¿Por qué’l votante d’izquierda debería apostar por Podemos?

Porque encarnamos un proyeutu sobre les bases de la defensa de la tierra, la rexeneración democrática y la xusticia social, un proyectu d’Asturies dende Asturies y p’Asturies ensin sucursalismos nin hipoteques.

¿Ve cambios na FSA de Barbón con respeuto a la de Fernández?

Hasta la fecha lo único que nos consta ye que Barbón ye más mozu. Más que cambios vemos un recambiu protagonizáu por daquién que tien medrao na vida al amparu de la FSA. Pero como nunca ye tarde encamentamos a Barbón a que nos demuestre que nos equivocamos, de momentu vamos ser escépticos

¿Tán abiertos a pautos colos socialistes tres el 26-M?

Los nuestros pautos sedrán sobre midíes concretes y que casen col nuestru proyectu de país. Los que quieran alcuerdos con nós pueden empezar estudiando bien el nuestru programa, que ye un programa fundamentáu de principiu a fin.

¿Veremos más avances con respeuto al asturianu y la so normalización nesta llexislatura?

Nesta llexislatura que terminó aprobóse un Plan de Normalización nel que vamos siguir afondando y, si llogramos articular una mayoría abonda, que son trés quintes partes de la cámara (27 escaños) habrá tamién reforma del Estatutu d’Autonomía pa, ente otres coses, reconocer la oficialidá del asturianu.

Na campaña llamen a los votantes a “llevantar a esta tierra”. ¿Ta Asturies fundida?

Falaba Andrés Solar nún d’aquellos poemes qu’escribía nel papel de los sacos del piensu qu’Asturies yera “un país que cayó una nueche a la mar y na mar y na nueche lu quixeron dexar”. Asturies pasa per malos momentos pero non por una suerte de fenómenu metereolóxicu, sinón por una serie de males decisiones polítiques que nun faen honor nin al nuestru paisaxe nin al nuestru paisanaxe. Asturies merez más y vamos poner too de la nuestra parte pa romper con esa dinámica perdedora, con eso qu’Emilio León denominaba “la conspiración de los tristes”. Hai que siguir.

¿Qué polítiques principales va desendolcar Podemos pa recuperala?

Caúna de les nuestres 280 midíes van empobinaes a meyorar la vida de les asturianes y los asturianos, pero ente les que más pruyen podría mentar la defensa del nuestru sector primariu poniendo la PAC al serviciu de los productores pequeños y medianos, entamar un plan contra les deslocalizaciones pa que nun se siga destruyendo emplegu na industria y la creación de puestos de trabayu en sectores d’I+D+i y col desendolcu d’un plan de transición enerxética.

No que cinca a les infraestructures necesitamos salir de la marxinación na que’l PP y el PSOE somorguiaron Asturies; non solo tenemos falta de meyor comunicación col esterior, con una Variante de Payares acabada y una autopista del Güerna ensin peaxe, sinón tamién articular Asturies afitándonos na xusticia territorial, con un nuevu modelu de movilidá sostenible qu’apueste por un tresporte públicu con precios populares y xestionáu dende equí y con un texíu productivu y unos servicios públicos que faciliten a la xente’l so  proyectu de vida en cualquier requexu d’Asturies. Nel nuestru horizonte más próximu tán la gratuidá de les escueles de 0 a 3 y de la universidá, ampliar les places de dependencia pa les persones mayores y terminar coles llistes d’espera na sanidá pública.

Semeya obra d'Iván G. Fernández.

Contador Estadistiques