El rector García Granda recibe'l Pegollu de los XXXIV Andrés Solar

|
Cartelu XXXIV Premios Andrés Solar

El Madreñazu ye pa Pablo Casado, presidente del PP. Antón Menchaca pon la nota musical.

Santiago García Granda, rector de la Universidá d'Uviéu, va acudir a la gala d'entrega de los XXXIV Premios Andrés Solar pa recibir el Pegollu, gallardón col que la Xunta pola Defensa de la Llingua Asturiana (XDLA) recompensa a "una entidá o persona que rescamplara pol so llabor en defensa o promoción del asturianu". L'escoyíu d'esti añu ye'l caderalgu de Química Física que dende'l 2016 ta al frente del Rectoráu "pol llabor que vien llevando alantre na normalización del asturianu na máxima institución educativa, investigadora y científica d’Asturies".

Precisamente, ayeri la Universidá d'Uviéu felicitó les Navidaes a tola sociedá con una tarxeta na que s'inclúi un 'Felices fiestes' xunto cola mesma frase en castellanu y inglés. D'igual forma, emplégase'l logotipu de la institución universitaria estrenada mientres la xestión de García Granda qu'incorpora'l so nome nestos trés idiomes.

El que nun s'espera qu'acuda a recoyer el so gallardón ye'l merecedor del Madreñazu. En concreto, l'antipremiu de los Andrés Solar "va pal discursu del odiu y negacionista xenófobu de Pablo Casado, cabezaleru de la organización política PP,que nos últimos tiempos vien faciendo declaraciones desinformaes y malintencionaes sobre l'asturianu".

Conciertu y espicha

La gala d'entrega de los premios entamaos n'alcordanza del escritor Andrés Solar, fináu n’accidente de tráficu nel 1984 a los 29 años d’edá, va comenzar a les 19 hores d'esta tarde nel Centru Cultural Antiguu Institutu de Xixón. Antón Menchaca, formación que propón una revisión de la tonada a partir de cantares tradicionales, va encargase de zarrar l'actu con una actuación.

Por último, la XDLA convida a tolos presentes a una espicha que va tener llugar, al igual que l'añu pasáu, nel propiu centru cultural. La entrada a la gala ye llibre.

Contador Estadistiques