Franco saldrá del Valle de los Caídos enantes de que fine l’añu

El Conseyu de Ministros aprobó'l decretu-llei que modifica la Llei de Memoria Histórica qu’activa’l procesu pa desenterrar los restos de Francisco Franco y treslladalos del Valle de los Caídos. El procesu va entamase enantes de que fine l’añu y la familia del dictador tendrá quince díes pa decidir el llugar onde enterralos.

“Ye inasumible pa una democracia madura que Franco tenga una tumba d’Estáu”, xustificó la vicepresidenta Carmen Calvo. La decisión del Gobiernu de Pedro Sánchez ha de pasar agora pel Congreso, onde se da por fechu que va salir alantre depués de qu’hai un añu s’aprobara una proposición non de llei del PSOE, na oposición naquel momentu, que pidía sacar a Franco “de manera urxente” del llugar y que s’aprobó con mayoría absoluta.

Naque’l momentu Ciudadanos votó a favor y agora señaló la so intención d’astenese, lo que nun bloquiaría la modificación. Mentes el PP anunció que va recurrir el decretu-llei.

El vienres próximu el Conseyu de Ministros aprobará un alcuerdu d’incoación pa dar un plazo de 15 díes a los interesaos pa que puedan personase nel procedimiento y realizar alegaciones. Nesi tiempo, dixo Calvo, “la familia va poder ser escuchada” y podrá comunicar ónde quier que sían enterraos los restos mortales del dictador.

Nel casu de que la familia nun se pronuncie, va ser el Conseyu de Ministru’l que tome esa decisión. Sobre los plazos, el Gobiernu confirmó que la salida de Franco del Valle de los Caídos produciráse enantes de fin d’añu.