Sánchez diz que’l desenterramientu de los restos de Franco va facese “nun espaciu breve de tiempu”

El presidente del Gobiernu estatal, Pedro Sánchez, compareció a pidimientu propiu nel Congresu pa presentar les llinies básiques del so Executivu. Anunció la prohibición por llei de les amnistíes fiscales, ente otros munchos asuntos, y confirmó’l desenterramientu “nun espaciu breve de tiempu” de los restos de Francisco Franco.

"El Gobiernu quier acompañar a la sociedá y tar al so llau", destacó Sánchez, qu’afitó’ crecimientu económicu; la creación d’emplegu; la igualdá y cohesión social; la rexeneración democrática; y tornar al corazón d’Europa como les exes principales del so mandatu. Ente los propuestes anunciaes ta la prohibición por llei de les amnistíes fiscales, un ameyoramientu de la financiación autonómica, un pautu de Toledo nuevu, l’impulsu d’un parque de 20.000 viviendes públiques en cuatro años y cambios nes normatives al alquiler, ente otros.

Tamién confirmó la decisión política y "firme" del so Executivu pa proceder al desenterramientu de los restos de Franco del Valle de los Caídos y esplicó que la so materialización ta pendiente de "los retoques últimos", polo que va tar llistu "nun espaciu breve de tiempu". "Les feríes”, añadió, “tuvieron abiertes mientres munchos años. Demasiaos. Llegó’l momentu de zarrales”.

Semeya de Pool Moncloa/ Fernando Calvo.