“Sacar a Franco del Valle de los Caídos ye urxente porque llevamos 40 años de retrasu”, señala Lastra

El Gobiernu de Pedro Sánchez pretende aprobar esti vienres un decretu-llei que modifique la Llei de Memoria Histórica p’activar el procesu de desenterramientu de los restos de Francisco Franco del Valle de los Caídos. El Partido Popular (PP) anunció que va recurrilu, mentes que Ciudadanos va astenese.

Adriana Lastra, vicesecretaria xeneral del PSOE y vocera socialista nel Congresu, afirmó güei n’Almería que “sacar a Franco del Valle de los Caídos ye urxente porque llevamos 40 años de retrasu”. L’asturiana calificó de “anomalía democrática” la esistencia d’un “mausoléu dedicáu a un dictador” y recordó que “organismos internacionales” como la ONX pidieron al Estáu que tomara esta midida.

Pa evitar posibles demandes xudiciales que pudieran allargar los plazos del procesu, l’Executivu escoyó la fórmula d’un decretu-llei, en concreto la reforma de dellos artículos del mesmu, como’l que se refier al Valle de los Caídos. Hai un añu’l Congresu de los Diputados aprobó una proposición non de llei del PSOE, na oposición naquel momentu, que pidía sacar a Franco “de manera urxente” del llugar que s’aprobó con mayoría absoluta, polo que Lastra cree que la Cámara baxa va respaldar agora el treslláu de los restos del dictador fináu nel 1975.

Postura ambigua

Teodoro García Egea, secretariu xeneral del PP, anunció güei que’l so partíu “va plantar cara y a recurrir los reales decretos que’l señor Sánchez intentará aprobar mientres l’añu próximu”. "La fórmula del real decretu ye pa cuestiones urxentes. Nun podemos votar a favor de midíes que se tomen con caráuter supuestamente d’urxencia p’abordar asuntos d’hai 40 años”, señaló, pa depués afirmar que lo que Sánchez intenta ye “resucitar a Franco y al pasáu porque nun tien futuru”.

Ciudadanos, que sí apoyó la proposición non de llei al respeuto del añu pasáu, va escoyer l’astención na votación, lo que nun bloquiaría’l desenterramientu de los restos de Franco.