Fina en Francia Vincent García Riestra, polesu sobreviviente del campu nazi de Buchenwald

De 94 años, Xuan Santori dio a conocer la so historia en ‘42.553: depués de Buchenwald’.

Vincent García Riestra nació en La Pola Siero nel 1925 y tuvo qu'exiliase en Francia con motivu de la Guerra Civil. Tres la ocupación nazi, resultó deteníu y treslladáu al campu de concentración de Buchenwald, asitiáu na redolada de la ciudá alemana de Weimar, que pese a nun ser un campu d'esterminiu sí cobró numberoses víctimes polos trabayos forzaos, los esperimentos médicos y les condiciones de vida de les prisioneros.

La mayor parte de los prisioneros Buchenwald yéralo por cuestiones polítiques, pasando per él unes 250.000 persones ente'l 1937 y el 1945. García Riestra llegó al campu nel 1944 y consiguió sobrevivir a esi infiernu.

Dende la so lliberación, l'asturianu dedicó tola so vida en contar la so esperiencia en centros educativos franceses cola fin de que nun s’escaezan los crímenes y la llocura del fascismu. Consideráu un héroe nel Estáu francés, ente les sos numberoses reconocencies tien la condecoración de más rangu de la República Francesa, la Legion d'Honneur.

Primer reconocimientu

N'Asturies y nel Estáu español, como asocede cola mayor parte de les persones que se vieron obligaes a colar pola Guerra Civil, nun tuvo la mesma respuesta. Foi Santori, cola so obra ‘42.553: depués de Buchenwald’, que mereció'l XXIII Premiu Máximo Fuertes Acevedo d'ensayu, correspondiente al 2017, el que dio a conocer más fondamente la so historia, momentu nel que llegaron los sos reconocimientos.

García Riesta, que llevaba'l 42.553 nel so traxe de prisioneru al ser el so númberu d'identificación nel campu, acudió'l xunu pasáu a la presentación n'Uviéu de dicha obra, que tuvo una gran repercusión, y foi recibíu por miembros del Gobiernu. Foi'l primeru de los munchos homenaxes que llevó n'Asturies dende entós el que yera últimu sobreviviente vivu de Buchenwald nacíu nel Estáu.

Esta mañana, por mor d'un cáncer, dexábanos nel hospital esti héroe de la Segunda Guerra Mundial que vivió los sos díes últimos na población occitana de Periguers, onde cuenta con una cai nel so honor.

Na semeya, García Riestra xunto con Santori n'Uviéu.