Presentación de '42.553: Depués de Buchenwald'

El salón d'actos del Muséu Arqueolóxicu d'Asturies n'Uviéu quedóse pequeñu pa la presentación del llibru de Xuan Santori  '42.553: Depués de Buchenwald' (Ed. Trabe), ganador del XXIII Premiu Fuertes Acevedo d'ensayu. El motivu foi la presencia nel actu del so protagonista, el polesu Vincent García Riestra, últimu sobreviviente español del campu de concentración de Buchenwald.

Nacíu nel añu 1925 y residente na población occitana de Periguers, García Riestra yera'l númberu 42.553 del campu de concentración asitiáu na redolada de la ciudá alemana de Weimar, que pese a nun ser un campu d'esterminiu sí cobró numberoses víctimes polos trabayos forzaos, los esperimentos médicos y les condiciones de vida de les prisioneros. 250.000 persones pasaron por él ente'l 1937 y el 1945, la mayoría por cuestiones polítiques.