“Esti trabayu lliterariu nuevu ye un diariu de suaños”, describe Maxi Areñes

|
Maxi Areñes con 'Suañando dende Areñes'

‘Suañando dende Areñes’ ye la obra nueva de Maxi Areñes, una colleición de rellatos y poemes que sigue la llinia de ‘Cuentinos dende Areñes’ y que’l músicu y escritor va presentar el vienres en L’Infiestu. Maitetxu Isla encárgase de les ilustraciones d’un trabayu lliterariu que'l xixonés define como “un diariu de suaños”.

Esti axitador cultural, como se define, presenta en ‘Suañando dende Areñes’ una serie de poemes de calter munchu más intimistes, ensín escaecer los rellatos en mou fábula. La so compañera de vida repite coles ilustraciones y les semeyes nesta autoedición.

“Noto que'l tiempu pasa, noto que dientro de min dalgo ta apagándo les lluces; ye por ello qu’intento representar lo que voi sintiendo. Ye daqué impulsivu que ta metío na mio mente; nun puedo nin quiero dexar de crear”, esplica l’autor. “A vegaes veo pequeñes coses, casi diminutes, que podríen pasar inadvertíes, peles caleyes d'Areñes, llugarín preciosu de Piloña onde resido, y esos pequeños acontecimientos son los que faen qu’escriba sobre ellos. Hai tou un universu nes coses pequeñes; hai un mundiu enllenu maxa malpenes perceptible que convive cola realidá. El vientu glaya cancios perguapos y namái tienes que querer sentilos. Les gotes d'orbayu cuenten pequeñes hestories mientres los gatos tán fixándose nos bailles que faen les pegues nel prau. Y toes estes coses cuenten verdaes xigantesques que puen estrapolase al nuesu díi a díi… Suañar, seguir suañando, quiciabes esto ye lo que mos fae iguales a toos”, añade.

El tamién músicu y escritor Tante Blanco y Monchi Álvarez, periodista de RPA, son los responsables de los dos prólogos del llibru, qu’inclúi un poema, ‘Canciu a mio pa’, musicáu por Fontoria –banda de la que forma parte Maxi Areñes– y presente nel discu ‘Nordés’. Esta pieza ta propuesta pa los Premios AMAS dientro de la categoría ‘Meyor Cantar Folk’.

La obra ‘Suañando dende Areñes’ va presentase’l vienres, a les 20.15 hores, na Casa Cultura Marqués de Vistalegre de L’Infiestu. Nel actu, que va presentar Enrique Carballeira, van tar presentes, amás del propiu autor, Isla y Blanco.

Contador Estadistiques