“Si esi cuentín diariu sirve pa sacar una sorrisa a dalguien, entós valió y val la pena”, apunta Maxi Areñes

Dende’l 17 de marzu, nel entamu del confinamientu pola pandemia, Maxi Areñes nun falla con un cuentu diariu nel programa ‘Más de uno’ d’Enrique Carballeira n’Onda Cero Oriente. Una escoyeta de los mesmos formen parte de ‘Cuentinos dende la radio’, el llibru nuevu del músicu y escritor que zarra la triloxía entamada nel 2018.

“La esperiencia foi maraviyosa, y el mayor reconocimientu alcontrélu na cai. Ye una sensación perrara dir a facer la compra y alcontrar xente que nin siquier conoces y que tea dan les gracies por esos minutinos diarios na radio… Ye peremocionante y reconforta y anima munchu. Esi reconocimientu na cai ye’l que me val. Pienso en tanta xente mayor que viven solos, cola radio como compañera, y si esi cuentín diariu sirve pa saca-yos una sorrisa, entós valió y val la pena”, espresa Maxi Areñes, que reconoz tar mui afeutáu pola situación que tamos viviendo.

“Esti 2020 foi una auténtica pesadiella pa toos, pero a min embaxonóme munchísimu. Dexóme la salú, que yá venía tocada, entovía más perxudicada, y munches vegaes cuntar una historia pa llevantar el ánimu, o al menos intentalo, cuando tú tás destrozau psicolóxicamente, ye una tarea perfastidiada”, esplica. Sicasí, agradez enforma a Carballeira “la oportunidá tan guapa que me dio al ofreceme narrar aquel primer cuentín que se convirtió nuna seición fixa del programa ‘Más de uno’”.

‘Cuentinos sobre la radio’, ilustráu tamién por Maitetxu Isla y prologáu nesta ocasión por Carballeira, completa la triloxía entamada por ‘Cuentinos dende Areñes’ (2018) y ‘Suañando dende Areñes’ (2019). La temática de los cuentos “ye mui variada, como yá ocurriera nos otros llibros. La fábula, xéneru nel que m’alcuéntrome percómodu, sigue presente, y incorporo dalgún qu’otru cuentu basáu en noticies que me llamasen l’atención nel momentu”.

Mañana, presentación en L'Infiestu

Maxi Areñes, que ta trabayando anguaño nel tercer discu de Fontoria, de nome ‘Sirio’, va presentar el so llibru nuevu mañana a les 17 hores na Sala Polivalente de L’Infiestu, eventu pal que ye necesario acutar plaza na Casa de Cultura o al traviés del teléfonu 985.71.11.33. Va consistir nuna charra-coloquiu na que tamién va participar Isla y Carballeira y nuna pequña actuación musical del propiu autor.