Entrerríos, a un pasu de la so segunda medaya

El combináu de balonmano remontó énte Suecia y va xugar les semifinales con Dinamarca.

Raúl Entrerríos quería poner el ramu a la so carrera con una medaya olímpica y yá ta a piques de traela p'Asturies. El capitán de la seleición española aportó 5 tantos y la so esperiencia nel enfrentamientu de cuartos de final con Suecia y ta a una victoria de sumar el so segundu metal depués del de bronce en Beijing 2008.

L'equipu nórdicu llevó la iniciativa tol partíu, pero foi nel tramu final cuando los de Jordi Ribera pudieron dar la vuelta al marcador. El propiu Entrerríos, el porteru Pérez de Vargas, hasta los diez minutos últimos práuticamente inéditu pol aciertu suecu nel llanzamientu, y Dujshebaev foron claves pal trunfu final por 34-33.

El xueves a les 14 hores (21, hora llocal), España va enfrentar con Dinamarca, que ganó a Noruega por 31-25, pa un puestu na final que garantice medaya. La otra semifinal, que se xuega a les 10 (17, hora llocal), crucia a Francia con Exiptu, que derrotó a Alemaña por 31-26.