La derrota con Dinamarca separta a Entrerríos del oru

El combináu español capitaniáu pol xixonés va xugar con Exiptu'l partíu pol bronce.

Nun va poder abandondar les canches Raúl Entrerríos con una medaya d'oru o de plata en Tokyo 2020. España perdió nun competíu choque con Dinamarca, actual campeona del Mundu que yá eliminara a los de Jordi Ribera en semifinales del Mundial d'Exiptu xugáu en xineru, por 23-27.

Al igual qu'asocedió en cuartos con Suecia, la seleición española ufrió la so meyor versión na segunda parte, a la qu'entraron con un 10-14 en contra, consiguiendo ponese a 1 gol (21-22) a falta de 7 minutos pal final. Pero esta vegada los Entrerríos –autor de 2 goles–, Dujshebaev y compañía atoparon una muria enfrente y nun pudieron repetir la fazaña.

El sábadu, a les 10 hores (17, hora llocal), va tener llugar el choque pol bronce, metal que'l xixonés yá llevó en Beijing 2008, contra Exiptu, que cayó tamién por 23-27 con Francia. La final pol oru ente daneses y franceses va celebrase a les 14 hores (21, hora llocal) nesa mesma xornada.

Sétimu na final del K-1 200

Saúl Craviotto, palista catalán con residencia en Xixón, entró na final del K-1 200 metros, dalgo que nun taba nes sos previsiones en Tokiu, y finó sétimu. El so oxetivu nestos Xuegos Olímpicos ye la prueba K-4 500, na que va competir na segunda serie mañana a les 3.51 hores (10.51, hora llocal) pa buscar una plaza en semifinales.

Na semeya, Entrerríos na xugada del primer de los sos dos goles nel choque.