Carreño trai'l bronce de Tokiu a Asturies

El tenista xixonés recuperó de la derrota en semifinales y sacó del partíu a Djokovic. López queda ensin medaya llueu de la derrota del combináu de ḥoquei yerba con Gran Bretaña.

Llueu de la seca en Rio 2016, Asturies pue presumir de tener un medayista olímpicu nuevu. Ye Pablo Carreño, na prueba individual de tenis, depués de firmar una competición escelente namái manchada pol tropiezu en semifinales col rusu Karén Khachánov, finalmente plata al cayer na final col alemán Alexander Zverev por 6-3 y 6-1.

Pel camín quedaron, ente otros, el númberu 2 del Mundu, el tamién rusu Daniil Medvédev, y yá nel partíu decisivu pol bronce, el númberu 1, Novak Djokovic. El xugador formáu nel Real Grupo de Cultura Covadonga, 11 del ranking ATP y sesta cabeza de serie en Tokyo 2020, supó mandar y tamién sufrir, viendo como'l serbiu salvaba una bola de partíu depués de perder el primer set por 6-4.

El segundu sería finalmente pa Djokovic por 7-6, pero'l balcánicu acabaría desquiciáu al vese superáu nel terceru por Carreño, que lu ganó por 6-3. Sicasí, nunca baxaría los brazos, necesitando'l xixonés otros cinco puntos de partíu pa colgase'l bronce.

FIn del suañu olímpicu

María López, capitana de la seleición española de ḥoquei yerba, tuvo que conformase con un diploma olímpicu en Tokyo 2020, el segundu depués del algamáu en Rio 2016. L'equipu dirixíu precisamente por un inglés, Adrian Lock, xugóse'l pase a semifinales nos shoot outs con Gran Bretaña, defensor del oru y verdugu d'España en Brasil tamién en cuartos, depués d'un empate a 2 goles, tantos anotaos por Iglesias y Bonastre pa igualar nos dos casos el partíu, tanda na que les britániques tuvieron más acertaes.

Mentes, el combináu de balonmano, capitaniáu por Raúl Entrerríos, xuega mañana a les 6.15 hores (13.15, hora llocal) en cuartos con Suecia pa consiguir una plaza pa semifinales depués de ganar a Arxentina'l domingu por 36-27, garantizando asina la segunda plaza del grupu A. Nel casu de pasar, enfrentaríase col ganador del Dinamarca-Noruega.