'En Llaviana quiero tar', villancicu fechu a comuña ente los vecinos

Llaviana yá cuenta con villancicu propiu. Lleva’l nome de ‘En Llaviana quiero tar tar’, fixéronlu en comuña los vecinos del conceyu baxo la coordinación d’Alfredo González en trés xornaes de creación, y va presentase esti martes depués de que se grabara nos Tutu Estudios.

El proyeutu ‘El mio villancicu’, entamáu pola Conceyalía de Cultura del Conceyu de Llaviana dende'l Serviciu de Normalización Llingüística a propuesta de l’Asociación de Autónomos de Laviana (AULAV) y desendolcáu pol Grupo A Mansalva, destacó como un ésitu nel conceyu. Foron numberosos los ciudadanos que s’animaron a acudir al Centru d’Innovación y Desendolcu del Altu Nalón (CIDAN) p’aportar les sos idees pal primer villancicu llavianés y, al empar, conocer de primer mano de músicos profesionales cómo ye’l procesu de composición d’un cantar.

Mañana, a les 11 hores nel propiu CIDAN, a la puerta de la Navidá, va dase a conocer l’esperáu resultáu final. ‘En Llaviana quiero tar’ grabóse díes atrás en Corvera, nos Tutu Estudios, cola participación del propiu González, Ulises García (Buenaventura) y Pelayo Gallego (Los Trujas) y voces infantiles.