El villancicu ‘En Llaviana quiero tar’ yá suena per tol conceyu de Llaviana

|
Presentación del villancicu 'En Llaviana quiero tar'

'En Llaviana quiero tar / cuando seya Navidá. / Yo nun vuelvo pal Nalón / porque nun supi marchar' ye l’estribillu de ‘En Llaviana quiero tar’, el villancicu que yá suena nel conceyu y en toda Asturies. El proyeutu ‘El mio villancicu’ ganó el premiu estatal #PueblosQueBrillan que va facer que suene tamién en Castilla.

Esta mañana presentóse nel Centru d’Innovación y Desendolcu del Altu Nalón (CIDAN) la grabación final de ‘En Llaviana quiero tar’, compuestu a comuña poles vecines y vecinos de Llaviana baxo la coordinación d’Alfredo González en trés xornaes de creación. El villanciu grabóse nos Tutu Estudios de Corvera, procesu nel que participó Diego Prieto (Teksuo), a la voz; Ulises García (Buenaventura), a la guitarra llétrica; Isra Sánchez, a la batería y percusiones; y Sergio Rodríguez, al baxu, colos coros de Pelayo Gallego (Trujas), Pablo Carrera, Olegario y Ariadna Díaz, Irene Álvarez, Paula y Lucía Díaz, Lucía Fernández y Paula Tauriño.

“Ye un cantar realmente emotivu que reflexa la fuercia d’esti conceyu minero, qu’empondera’l so patrimoniu cultural y les sos xentes y qu’a min especialmente me llegó al corazón”, afirmó la vicealcaldesa y conceyala de Cultura, Inés García, na presentación. Pablo Carrera, del Grupo A Mansalva, empresa encargada de desendolcar esti proyeutu entamáu dende'l Serviciu de Normalización Llingüística a propuesta de l’Asociación de Autónomos de Laviana (AULAV), destacó “la fuercia del cantar, que resulta mui apegadizu, con una melodía increíble”.

‘En Llaviana quiero tar’ va dar el saltu a les nueses llendes y va sonar el vienres en Maranchón na guitarra y voz de Tante Blanco, que collaboró na so composición. La razón ye la entrega del Premio #PueblosQueBrillan qu’entrega la empresa Iberdrola a ésta y otres iniciatives d’otres poblaciones.

Lletra de ‘Llaviana quiero tar’:

Voi falate dende Entrialgo
de l'aldea que se perdió
d'una xente solidario,
reñacíos del carbón.

Al mirar pal Pozu Carrio
veo "llucha y el llabor"
el que nun vuelve a esti pueblu
tien de fierro'l corazón.

En Llaviana quiero tar
cuando seya Navidá.
Yo nun vuelvo pal Nalón
porque nun supi marchar.

El cumal de Peña Mea
engarriándose col sol,
ver el pasu de los años
na paré del Torreón...

Voi pidí-y al Añu Nuevu
que me dexen onde toi,
que nes cais del mio conceyu
tengo más de lo que doi.

En Llaviana quiero tar
cuando seya Navidá,
Yo nun vuelvo pal Nalón
porque nun supi marchar.

 

 

Contador Estadistiques