Los vecinos de Llaviana van componer un villancicu pal conceyu

L’Ayuntamientu de Llaviana entama unes xornaes de creación nel CIDAN pa componer un villancicu propiu pal conceyu, una idea d’AULAV que desendolca’l Grupo A Mansalva baxo’l nome de ‘El mio villancicu’. Alfredo González va encargase de la so coordinación.

Tolos habitantes y les entidaes estremaes de Llaviana, independientemente de los sos conocimientos lliterarios y musicales, tán convidaos en participar nesta iniciativa na que tamién va formar parte el llavianés Tante Blanco, que, xunto a González, va deprender a los participantes el procesu de creación d’un cantar. El músicu de Turón va encargase de recoyer toles idees, recursos, refranes, pallabres o nomes particulares del conceyu que los vecinos puedan aportar pa la ellaboración del villancicu de Llaviana.

El tema que surda de les trés xornaes de creación programaes va a grabase depués nun estudiu profesional por músicos y vocalistes llocales, cola idea d’estrenalu na web de la Casa Conceyu, redes sociales y plataformes dixitales la selmana de Navidá. El Centru d’Innovación y Desendolcu del Altu Nalón (CIDAN) va acoyer estes cites güei, mañana y el martes viniente a les 19.30 hores.

Na semeya, Enol Puente, responsable del Serviciu de Normalización Llingüística de Llaviana; Alberto García Morán, conceyal de Mocedá; Inés García Vega, vicealcaldesa y conceyala de Cultura; González; y Pablo Carrera, direutor del Grupo A Mansanva.