El XXII Seminariu d’Estudios Asturianos de Belenos, dedicáu a les mazcaraes, inclúi un pasucáis per La Puela

La Fundación Belenos torna a La Puela pa entamar el XXII Seminariu d’Estudios Asturianos. Nesta edición lleva'l nome de ‘Na llende d’un tiempu escuru: les mazcaraes d’iviernu n’Asturies’ y inclúi un pasucáis el domingu con una pequeña amuesa de les d’Allande, Tinéu y Uviéu.

L’alcalde, José Antonio Mesa, y Lisardo Lombardía, presidente de la Fundación Belenos, van inaugurar mañana a les 10.30 hores el Seminariu na Casa Cultura, pa dar llueu pasu a les conferencies con accesu pa la xente matriculao. La primera va tratar sobre ‘Les mazcaraes tradicionales n’Europa’, a cargu del etnógrafu Óscar J. González, autor del llibru ‘Mascaradas de la Península Ibérica’, pa siguir Xosé Antón Fernández ‘Ambás’ y Ramsés Ilesies, responsables del Archivu de la Tradición Oral d’Ambás (ATOAM), con ‘L’ATOAM na recuperación de Los Aguilandeiros de San Xuan de Villapañada (Grau) ya una chalga nel mundu de la mázcara tradicional asturiana’.

Depués d’una posa, va zarrar la programación mañanera la etnohistoriadora y esperta n’interpretación del patrimoniu, Cristina Cantero, con ‘Los Sidros de Siero. Una tradición en cambiu permanente’. A les 17 hores va retomase l’actividá con ‘Les mazcaraes y los aguilandos en Tinéu’, a cargu de Elías Veiga y Rosa F. Delgado, etnógrafos y miembros d’esta mazcarada, pa depués mirar pa ‘L’aguilandu en Xedré (Cangas del Narcea)’ col tamién etnógrafu Naciu’l Riguilón, autor del llibru ‘L’aguinaldu nel suroccidente d’Asturias’.

Recupérase’l filandón

Van pesllar esta primer xornada l’artista Ánxel Nava con ‘Una mazcarada urbana recuperada apocayá: Los Mazcaritos d’Uviéu’ y Ana Díaz, graduada en Turismu y fundadora de Green Door Asturias, con ‘Una mazcarada llocal: Os Reises d’El Valledor’. Esti añu, cola ‘normalidá nueva’, recupérase’l filandón, con música del país hasta bien entrada la nueche.

El tradicional Conceyu Abiertu de la mañana del domingu, previstu pa les 11.30 hores, va centrase en ‘Personaxes de les mazcaraes: pequeña amuesa de les mazcaraes d’Allande, Tinéu y Uviéu’. Depués va entamase un pasucáis con personaxes d’Os Reises del Valledor, Los Guilandeiros de Tineú y los Mazcaritos d’Uviéu.

Una xinta va poner el pieslle a estes xornaes dedicaes tolos años a una temática que la Fundación Belenos entama tolos meses de payares en La Puela axuntando un bon númberu d’espertos y persones interesaes na cultura del país.

Na semeya superior, Guilandeiros de Tinéu. Na inferior, cartelu del Seminariu, diseñáu por Ástur Paredes.