La Fundación Belenos celebra'l XXIII Seminariu d'Estudios Asturianos

Esta edición lleva por títulu '¿Aú vas, Asturies? Segunda conxusta al rodiu d'una idega d'Asturies', con convidaos de primer nivel.

El XXIII Seminariu d'Estudios Asturianos de la Fundación Belenos celébrase mañana y domingu en La Puela. Xosé Alba, Inaciu Iglesias, David Guardado, Pablo Batalla y Pilar Sánchez Vicente van poner les diferentes conferencies, que se concentren na primer xornada.

El profesor d'Economía de la Universidá d'Uviéu va falar, depués de la inauguración prevista a les 10.30 hores, de 'La necesidá de saber qué quermos p'Asturies'. Va siguir al meudía l'empresariu con 'En dos pallabres: ensin mieu', pa finar la mañana a les 13.30 el vicepresidente nuevu de l'Academia de la Llingua Asturiana y autor del conocíu ensayu ‘Nunca vencida. Una historia de la idea d'Asturies’, con 'El discursu de la renuncia asturiana: qué ye y cómo superalo'.

Yá de tarde, el periodista va poner la intervención 'Asturies vista dende'l nacionalismu español' a les 17 hores, pa pesllar la escritora con 'Hai futuru'. El domingu pela mañana va haber un conceyu abiertu dende les 11 hores colos conferenciantes y asistentes que va moderar Lisardo Lombardía.