'L'horru asturianu énte'l futuru', temática del XXI Seminariu d'Estudios Asturianos de Belenos

La Fundación entámalu esta fin de selmana en La Puela depués d'aplazar el del añu 2020.

El Seminariu d'Estudios Asturianos de la Fundación Belenos torna a axuntar n'Allande a espertos y persones interesaes na cultura asturiana dos años depués. 'L'horru asturianu énte'l futuru' ye'l lema d'esta edición, la ventena primera, centrada nesta construcción tan simbólica pal país.

Lisardo Lombardía, presidente de la Fundación Belenos, va inaugurar mañana a les 10.30 hores na Casa Cultura esta edición nun actu nel que van participar l'alcalde José Antonio Mesa y el direutor xeneral de Política Llingüística, Antón García. Fernando Mora Rodríguez, arqueólogu de l'asociación Amigos del Hórreo Asturiano, va protagonizar la primer conferencia, 'El valir del horru asturianu como patrimoniu cultural', pa llueu dar pasu a César Javier Álvarez, téunicu xurista de la Conseyería de Cultura, Política Llingüística y Turismu, que va falar de les 'Solombres y lluces del patrimoniu etnográficu asturianu".

Depués d'un parón pa la xinta, a les 16.45 hores la etnohistoriadora Cristina Cantera va poner la charra 'L'horru asturianu. Tensión y discutiniu ente la realidá xurídica y sociocultural del patrimoniu', pa finar el día con 'La tramitación urbanística y alministrativa al rodiu l'horru: una oportunidá de futuru', a cargu del arquiteutu Xuan Pedrayes. Por mor de la situación sanitaria pola pandemia de COVID-19, esti añu nun se va entamar el tradicional filandón con música del país nel Café Centro.

El domingu, a les 10.30 hores, va celebrase un conceyu abiertu nel que van tomar parte Juaco López, direutor del Muséu del Pueblu d'Asturies; Víctor Manuel Suárez García, presidente d'Amigos del Hórreo Asturiano; y Ástur Paredes, coordinador del Seminariu d'Estudios Asturianos. Una xinta va sirvir de pieslle d'una edición que llega depués de que la del 2020, que se diba dedicar a les mazcaraes d'iviernu asturianes, s'aplazara pola segunda fola de la COVID-19.