La Folixa PreFIG va contar con una espicha y conciertos en Villaviciosa

La Banda de Gaites Villaviciosa-El Gaitero va abrir les actuaciones de la fiesta na Plaza'l Mercáu, na que van tocar dos bandes folk.

El XVII Festival Internacional de la Gaita (FIG) va celebrase del 5 al 8 de setiembre, pero mañana en Villaviciosa va celebrase un adelantu cola fin de recaudar perres pa siguir potenciando un certame que medra añu a añu. Lleva'l nome de Folixa PreFIG y va animar la tarde-nueche mañana con una espicha y actuaciones de calidá.

L'apertura de puertes va ser a les 20 hores pa les persones que mercaran el vale pa cenar, mentes que los conciertos van principiar a les 22 hores, con accesu llibre. La organizadora Banda Gaites Villaviciosa-El Gaitero va ser la primera n'actuar, pa llueu dar pasu a Loína, banda formada polos hermanos Andrea y Rodrigo Joglar y Julio Rodríguez, y a Llau, compuesta por Dani Álvarez, Lisardo Prieto y Luis Nicolás.

La folixa va allargase hasta bien entrada la madrugada, yá que llueu de les actuaciones va haber escenariu abiertu. La Plaza'l Mercáu va contar con serviciu de chigre.

Na semeya, la Banda de Gaites Villaviciosa-El Gaitero.