547 casos nuevos de COVID-19 esti miércoles

Hai que llamentar 11 finaos, la cifra más alta de la tercer fola. Carreño sal del avisu de riesgu estremu, al que torna Valdés.

A falta del espublizamientu de los datos oficiales de la COVID-19, la Conseyería de Salú comunicó la detección de 547 contaxos ayeri. Son 44 menos que'l día anterior, pero'l segundu rexistru más altu del tercer envite de la pandemia.

El Serviciu de Salú del Principáu d'Asturies (SESPA) fixo 6.073 pruebes de diagnósticu d'infeición activa, polo que la tasa de positividá s'asitió nel 11,20 por cientu. Esti porcentaxe ye superior al del martes, cuando quedó nun 10,91 por cientu, mentes qu'a 7 díes ye del 10,52 por cientu na actualización última.

No que respeuta a les muertes foi la peor xornada del tercer fola, con un total de 11 que ponen l'acumuláu del andanciu en 1.492: seis muyeres de 92, 89, 87, 86, 85 y 72 años y cinco homes de 91, 88, 85, 85 y 77, de los que trés residíen en centros de mayores. Hasta'l momentu el rexistru más prietu diose'l vienres y el domingu, con 9.

Hai hospitalizaes 492 persones con confirmación o sospecha de COVID-19, a los qu'hai que sumar 85 que tán na UCI. Son 16 y 4 más que'l martes, de manera respeutiva.

Nivel d'alerta 4+

L'ameyoramientu de los sos datos permitió ayeri a Carreño salir de momentu del peligru d'entrar nel nivel d'alerta 4+, lo que facía un día enantes Valdés, que torna a tar na rampla de salida. Les restricciones venceyaes al riesgu estremu tán actives en 14 conceyos: Grau, Avilés, Castrillón, Corvera, Uviéu, Llanes, Cangas del Narcea, Gozón, Noreña, Xixón, Mieres, Samartín del Rei Aurelio, Ḷḷena y Ayer.

Pa consultar la situación de tolos territorios y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.