El villancicu ‘En Llaviana quiero tar’ va sonar en felicitaciones navidiegues personalizaes de 35 comercios

|
Preparación del villancicu 'En Llaviana quiero tar'

El proyeutu ‘El mio villancicu’, que nació l’añu pasáu que los vecinos compunxeren en comuña un cantar navidiegu pa Llaviana, tien continuidá esti añu p'apoyar a los comerciantes del conceyu. Los primeros 35 que soliciten participar na iniciativa van poder grabar de baldre una felicitación na que va sonar el tema de fondu.

‘En Llaviana quiero tar / cuando seya Navidá. / Yo nun vuelvo pal Nalón / porque nun supi marchar”, l’estribillu del villancicu de Llaviana, va sonar tamién nestes Navidaes depués del ésitu que tuvo l’añu pasáu nesti conceyu de la cuenca. Y va facelo p’ayudar a los comerciantes nesta situación de crisis pola pandemia de COVID-19.

El Conceyu entama la segunda fase de ‘El mio villancicu’, que va consisitir na grabación de una felicitación navidiega personalizada en formatu videu pa cada negociu participante. Ésti va tener un llargor de 20 segudos, con recursos de les instalaciones y imaxe corporativa propies, nel qu’un máximu de trés de los responsables o trabayadores de cada establecimiento van poder felicitar les fiestes a los sos veceros y vecinos.

La grabación, valorada en 300 euros, va contar col ‘En Llaviana quiero tar’ como banda sonora, y los comercios van poder usala nes sos páxines web o redes sociales pa promocionase de cara a les merques navidiegues. Nesta iniciativa van poder tomar parte los 35 primeros negocios qu’unvíen a partir del llunes, a les 9 hores, el formulariu de participación al corréu de la Oficina d’Atención al Autónomu y Pymes del Conceyu de Llaviana informacion.autonomos@ayto-laviana.es.

El plazu d’inscripción va tar abiertu hasta’l xueves, a les 12 hores. La propuesta ‘El mio villancicu’ nació d’una idea d’AULAV y nella participa’l Grupo A Mansalva.

Na semeya, Alfredo González, de pie a la derecha, nuna de les sesiones de composición xunto colos vecinos del villancicu que s'encargó de coordinar y Tante Blanco.

Contador Estadistiques