El VII Premiu de Relatos Curtios Xosé Caveda y Nava recibe testos hasta'l día 20 d'ochobre

Entámalu'l Conceyu de Villaviciosa y tien una recompensa de 1.000 euros y la carauterística Mazana de Plata pal ganador.

Convocóse una edición nueva del Premiu de Relatos Curtios Xosé Caveda y Nava, qu'algama la so séptima edición. Cada participante va poder presentar una obra inédita escrita en llingua asturiana, qu'ha entregar per triplicáu y en sobre zarráu, indicando nel mesmu'l títulu de la obra ensin identificación de l'autoría, enantes del día 20 d'esti mes nel Rexistru o per corréu postal –tamién habría la opción de facelo al traviés de la sede electrónica del Ayuntamientu–.

La estensión de los trabayos, de tema llibre, nun va poder ser inferior a 3 folios nin superior a 12, escritos a una plana, a ordenador, con un interlliniáu de 1,5 y tipu de lletra Times New Roman de 12 puntos. Pue consultar les bases completes del concursu, que tien oxetu de fomentar la creación lliteraria en llingua asturiana y el so espardimientu, nesti enllaz.

El ganador del añu pasáu foi Pablo Rodríguez Medina, que presentó la obra ‘Redención’.

Na semeya, casa natal de Caveda y Nava.