Beatriz R. Viado ye la ganadora del VII Premiu de Relatos Curtios Xosé Caveda y Nava

La periodista d'El Remediu presentó a concursu la obra 'Micaela, con hache'.

Beatriz Redondo Viado llevó'l VII Premiu de Relatos Curtios Xosé Caveda y Nava qu'entrega'l Conceyu de Villaviciosa. Ésti tien una recompensa de 1.000 euros y la carauterística Mazana d'Oru.

El xuráu, formáu por Pablo Rodríguez Medina, ganador de la edición anterior por 'Redención'; l'autora merecedora del III Premiu Nacional de Lliteratura Asturiana, Lourdes Álvarez; y Llucía Menéndez Suárez, docente d’asturianu nel IES Victor García de la Concha, decidió ayeri por mayoría conceder el premiu al relatu entituláu ‘Micaela, con hache’. Al abir la plica, la escritora del mesmu resultó ser Viado.

Nacida nel 1976, ye llicenciada en Periodismu y en Filosofía, y tien escrito dos ensayos: 'El país del silenciu' (2007, a comuña cola agora viceconseyera de Cultura, Política Llingüísitca y Deporte, Ana Vanessa Gutiérrez) y 'Yá cuasi nunca lo facemos por amor' (2014), col que ganó’l XIX Premiu Máximo Fuertes Acevedo d'ensayu. Collaboradora anguaño en dellos medios de comunicación, foi direutora del selmanariu n'asturianu 'Les Noticies'.

Primer vencedora

Viado ye la primer muyer en llevar el Xosé Caveda y Nava. Enantes ganáralu en trés ocasiones Francisco 'Paco' Álvarez (2017, con 'Mar d'Irlanda'; 2019, con 'El faru de Viena'; y 2021, con ‘Les cenices de les últimes pallabres') y una José Ángel Gayol (2018, con ‘Tolo que sé sobre toles coses’) y Xavi Cayado (2020, con 'A pie firme'), amás de Rodríguez Medina l'añu pasáu.