El VI Xosé Caveda y Nava de relatos curtios ye pa Rodríguez Medina

‘Redención’ foi la obra ganadora del VI Premiu de Relatos Curtios Xosé Caveda y Nava qu’entama’l Conceyu de Villaviciosa. El so autor ye l’entreguín Pablo Rodríguez Medina, que va recibir la so primer Mazana de Plata, premiu conmemorativu d’esti concursu lliterariu.

El xuráu rescampló del relatu “la cotidianidá y emotividá de la trama y la cercanía y actualidá de la temática”. Ésti tuvo conformáu pol téunicu en normalización llingüística Rafael Rodríguez Valdés, la filóloga Marta López Fernández y el vencedor del añu pasáu, el periodista y escritor Francisco ‘Paco’ Álvarez, actuando como secretariu Pablo X. Suárez, responsable del Serviciu de Normalización Llingüística de la ‘Comarca de la Sidra’.

L’académicu Rodríguez Medina tien una amplia trayeutoria lliteraria y tien ganao el Premiu Xosefa Xovellanos de novela con ‘L'Arna de San Atanás’ y ‘Fame d'amor, determín de pasión’ y el Teodoro Cuesta de Poesía con ‘Aires de mudanza (y un apendix probi d'amor)’. Ésti ye’l so primer Xosé Caveda y Nava, que n’ediciones pasaes foi p’Álvarez (2017, con 'Mar d'Irlanda'; 2019, con 'El faru de Viena'; y 2021, con ‘Les cenices de les últimes pallabres'), José Ángel Gayol (2018, con ‘Tolo que sé sobre toles coses’) y Xavi Cayado (2020, con 'A pie firme').

En fecha por confirmar l’entreguín va recibir la Mazana de Plata y los 1.000 euros de recompensa colos que cuenta esti gallardón del Conceyu de Villaviciosa.