Naz en Breizh Muga, un tríu que trabaya repertoriu vocal femenín de raigañu asturianu

|
Muga

La cantante y percusionista d’Amieva afincada n’An Oriant, Clara Diez Márquez, cuenta con proyeutu musical nuevu. Trátase de Muga, un tríu formáu colos bretones Martin Chapron y Thomas Felder que prepara l'espectáculu ‘Chants de femmes des Asturies’ con feches yá zarraes dende marzu en tol Estáu francés.

“Muga ye un tríu que trabaya col patrimoniu de voz femenina n'Asturies. Pa los tres músicos del grupu, esti repertoriu, la llingua y les voces de les muyeres que lu tresmitieron y tresmiten tien una belleza radical que definimos col términu francés ‘brut’, que nun tien traducción esauta n'español o asturianu, pero'l significau va na llinia de lo arcaicu, auténticu, fuerte y brutal”, espica Diez d’esti proyeutu que yá tien zarraes delles feches en sales y festivales de tol Estáu francés dende marzu. Sobre los sos compañeros, destaca que “Thomas formó parte de la quinta Kreiz Breizh Akademi –formación pa músicos profesionales sobre musiques modales de tradición popular– y Martin estudió improvisación nel conservatoriu de Sant-Brieg, y dambos presenten un trabayu musical “al serviciu de la melodía, la voz y la llingua. Creen ambientes y testures sonores pa engrandecer la voz, esta voz de les muyeres asturianes”.

El tríu trátase d’una evolución del enfoque que dio a la música asturiana Amieva y pue definise como un grupu de conciertu, de música pa sentir, que ta inspiráu nel trabayu que faen en Gasconha cola música popular grupos como Artùs, Sourdure ou Faune. El téunicu de soníu Thomas Quéré ye’l próximu n’incorporase al proyeutu “porque les condiciones de sonorización nun son les mesmes d'un bolu a otru y sonorizar la pandereta y el panderu nun ye fácil”.

Asina, Diez (voz, pandereta y panderu), Chapron (guitarres) y Felder (violín) ameyoren les condiciones pa dotar  a esta música de “una nueva dimensión artística que s’alloñe del dogma de la tradición centrándose nes perceiciones personales de cada músicu”. Sobre l’escenariu la cantante asturiana propón una serie de cantos, yá sía pal baille, pa neños, p’acompañar un ritual o romances y tonaes, a los dos músicos bretones, nuna confluencia de les dos cultures.

Micropoemes de Texón com filu conductor

L’últimu fichaxe de Muga va ser Pablo Texón, que va encargase d’escribir dellos micro-poemes sobre histories cotidianes de muyeres asturianes pa facer de filu conductor del espectáculu que va llamase ‘Chants de femes des Asturies’, que n’asturianu traduzse como cantares de muyeres d’Asturies. Pa preparar el mesmu, el tríu tien previsto entrar na primer selmana d’abril a una sala de creación artística d’An Oriant “pa trabayar el repertoriu en condiciones óptimes de soníu y lluces”.

Na imaxe, Chapron, Diez y Felder. Semeya obra de Cédric Raylet.

Contador Estadistiques