El topónimu 'El Valle Altu de Peñamellera' sustitúi al de 'Peñamellera Alta'

|
Valle Altu de Peñamellera

El BOPA espublizó esti vienres los decretos que determinen la toponimia oficial nueva, la tradicional, de los trés conceyos últimos a los que dio’l preste’l Gobiernu, polo qu’éstos yá entren en vigor. Son El Valle Altu de Peñamellera, San Tiso d’Abres y Tapia.

La modificación del topómimu que da nome al conceyu, pasando de ‘Peñamellera Alta’ a ‘El Valle Altu de Peñamellera’, ye l’únicu que se da nesti espediente, calteniéndose Alles, Cáraves, Llonín, Mier, Oceño, Rozagás, Ruenes y Trescares. Sicasí, incorpórense los topónimos recoyíos d’otres entidaes menores d’estes parroquies.

Sí que s’atopen munchos cambios na toponimia de San Tiso d’Abres, onde vemos como ‘A Antigua’ pasa a ser la oficial por ‘La Antigua’, al igual que ‘Os Castros’ (‘Los Castros’), ‘Foxas’ (‘Fojas’) o ‘Sobredaveiga’ (‘Sobrelavega’). Mentes, Tapia pierde el ‘de Casariego’ y recupera nomes de llugar como ‘A Roda’ (‘La Roda’), ‘A Reburdia’ (‘Entreplayas’) o ‘San Cristoba’ (‘San Cristobal’), ente otros.

Con estos trés conceyos, yá son 59 los que faen oficiales los sos topónimos tradicionales. De los que queden, tienen l’espediente avanzáu Cabrales, Llanera, Castropol, Cuaña, Les Regueres, Onís y Somiedu; abiertu Cuideiru, Villayón, Ayande, Caravia, Ibias, El Valle Baḥu de Peñamellera, Salas, Uviéu y Muros; y ta previsto que lo soliciten en meses próximos Eilao, Navia y Pravia.

Contador Estadistiques