El pidimientu d’Eilao va completar el procesu de revisión toponímica de los conceyos del país

Estos díes ta previsto qu’Eilao dea’l pasu de solicitar la revisión de la so toponimia, zarrándose asina esta fase del procesu de recuperación toponímica. Hasta la fecha 59 de los 78 conceyos del país yá oficializaron los sos nomes de llugar tradicionales.

Cola aprobación de la Llei de Promoción y Usu del Bable/Asturianu, nel añu 1998, afitóse la recuperación de los topónimos tradicionales del país, castellanizaos na mayor parte. La creación nel 2004, na so etapa actual, de la Xunta Asesora de Toponimia abrió un procesu nel que los conceyos, de manera voluntaria, solicitaben la revisión de la so toponimia pa dar el pasu d’oficializar la tradicional, ciclu que va zarrase agora col pidimientu d’Eilao.

El Franco, Carreño y Llanes, en mayu del 2005, foron los primeros conceyos qu’algamaron la oficialidá de los nomes de llugar tradiciones tres aprobar el Conseyu de Gobiernu los sos respeutivos espedientes. D’esta manera, los topónimos castellanos quedaben derogaos y los de tola vida pasaben a ser los únicos válidos, dalgo que, sicasí, en munchos casos quedó en papel moyao pol desinterés de les propies alministraciones.

De momento, tres l’aprobación en xineru de los decretos d’El Valle Altu de Peñamellera, San Tiso d’Abres y Tapia, son 59 los conceyos cola toponimia tradicional recuperada y oficial. Col pidimientu agora d’Eilao, los 19 restantes van tener el so espediente abiertu, complentando asina esti ciclu que s’abrió hai agora 14 años.

Cabrales, Llanera, Castropol, Cuaña, Les Regueres, Onís, Somiedu, Cuideiru, Villayón, Ayande, Caravia, Ibias, El Valle Baḥu de Peñamellera, Salas, Uviéu, Muros, Navia, Pravia y Eilao conformen esta llista. La direición xeneral de Planificación Llingüística y Normalización cuenta con que s’apruebe la toponimia d’al menos seis d’estos conceyos enantes del final de la llexislatura actual.